Sipas të dhënave të Policisë së Kosovës vetëm në dy vitet e fundit janë sekuestruar afër 2 mijë e 500 armë pa leje.
“Në vitin 2020, policia ka konfiskuar 1135 armë dhe 32747 municion të llojeve të ndryshme, ndërsa në vitin 2021, policia ka konfiskuar 1280 armë dhe 42031 municion të llojeve të ndryshme”, thuhet në përgjigjen e PK-së.
Ndërkohë, sipas ekspertëve të sigurisë, numri i armeve ilegale që qarkullon në vend, është shumë më i madh.
“Sipas një raporti të OSBE-së të vitit 2011, është përshkruar që në duart e qytetarëve në Republikën e Kosovës ndodhen 230 mijë deri në 250 mijë armë luftarake, kjo është si pasojë e luftërave të fundit…”, thotë Drizan Shala.
Por, pse kosovarët po hezitojnë të pajisen me lejen për armëmbajtje?
“Shkak janë procedurat si dhe frika, sepse ato armë janë blerë dorë pas dore, qytetarët frikësohen mos është kryer ndonjë vepër penale me to, pastaj mund ta fajësohen…”, thotë Shala
Nga Policia e Kosovës, kanë thënë se pas përfundimit te procedurave dhe pas marrjes se konfirmimit nga organet e drejtësisë, këto armë shkatërrohen.
Ndryshe, vetëm gjatë katër muajve të parë të këtij viti, në Kosovë janë shënuar 25 vrasje.
Kronika e realizuar nga gazetari Fidan Zejnullahu
