Institucionet e Kosovës po vazhdojnë të mbledhin dëshmitë e krimeve të kryera nga serbët gjatë luftës në Kosovë.
Kryeministri Albin Kurti sot priti në takim drejtorin ekzekutiv të Institutit të Krimeve të Kryera gjatë Luftës në Kosovë, Atdhe Hetemi, me të cilin ka biseduar mbi raportin e parë gjashtëmujor të këtij procesi kaq të rëndësishëm për Kosovën.
Kurti tha se tashmë është funksionalizuar Instituti i Krimeve të Kryera gjatë Luftës në Kosovë, i cili do të merret me mbledhjen e dëshmive për masakrat, torturat, dhunimet, pengjet e luftës, zhdukjet me dhunë, plaçkitjet, shkatërrimet dhe të gjitha krimet e kryera gjatë luftës.
“Të gjitha dëshmitë e krimeve të kryera gjatë luftës në Kosovë, të ruajtura nga organizata vendore e ndërkombëtare, nga hulumtues e dokumentues, bashkë me dëshmi të pa mbledhura deri më tash, vazhdojnë të mblidhen nga institucionet e Republikës së Kosovës. Për narracione të vërteta dhe të sakta për masakrat, torturat, dhunimet, pengjet e luftës, zhdukjet me dhunë, plaçkitjet, shkatërrimet dhe të gjitha krimet e kryera gjatë luftës, për kujtesën tonë kolektive dhe për trashëgiminë tonë, e kemi të funksionalizuar Institutin e Krimeve të Kryera gjatë Luftës në Kosovë”, ka shkruar Kurti në Facebook.
Ndryshe, Kosova ka paralajmëruar se do ta padisë Serbinë për gjenocid ndaj shqiptarëve. Gjatë luftës në Kosovë, u vranë mbi 10 mijë shqiptarë.
Sipas një raporti të UNHCR-së, më shumë se 860 mijë shqiptarë u dëbuan nga shtëpitë e tyre nga forcat serbe nga Kosova gjatë periudhës 23 mars-9 qershor 1999. Një shifër e ngjashme përmendet edhe në një raport të OSBE-së, ku thuhet se 863 mijë civilë u dëbuan nga Kosova gjatë të njëjtës periudhë.