Kombëtarja U21 e Kosovës ka bërë një përparim të rëndësishëm në renditjen e UEFA-së.
“Dardanët” e rinj të udhëhequr nga Afrim Tovërlani janë ngjitur në pozitën e 33-të në ranglistën e UEFA-së, ka njoftuar FFK-ja të enjten.
Kjo ngritje e konsiderueshme vjen si rezultat i paraqitjeve të mira gjatë ciklit aktual të kualifikimeve për Kampionatin Evropian dhe do të thotë që Kosova do të kalojë nga vazoja e pestë në vazon e katërt në shortin për kualifikimet e ardhshme evropiane.
“Ky është një hap i rëndësishëm për Kombëtaren U21, e cila tani do të ketë mundësi më të mira për kualifikimet e ardhshme”, thuhet ndër të tjera në njoftimin e FFK-së.
Kosova U21 është pjesë e Grupit D në kuadër të kualifikimeve për “Euro 2025” dhe zë vendin e katërt në grup me 9 pikë të mbledhura pas shtatë ndeshjeve të luajtura.
Pjesë e këtij grupi janë edhe Gjermania, Polonia, Bullgaria, Estonia e Izraeli. Deri në fund të këtij cikli eliminator, Kosova i ka edhe tri ndeshje për t’i luajtur gjatë muajit shtator dhe tetor.