Kosova ka luajtur plot ndeshje të veçanta deri më tani, por jo edhe të pazakonta.
Një nga ndeshjet më të pazakonta, megjithatë do ta ketë të dielën mbrëma në “Fadil Vokrri” ndaj Izraelit.
Ndeshja është dashur të luhej muajin e kaluar, por u shty për shkak të gjendjes së sigurisë në Lindjen e Mesme, por që FIFA vendosi që ndeshja të luhet më 12 nëntor, jashtë terminit të rezervuar për përfaqësuese. Kjo solli telashe me grumbullimin e lojtarëve, pasi skuadrat evropiane kanë ndeshje të rregullta në fundjavë. Vetëm Mallorca e Vedat Muriqit ka shtyrë ndeshjen e fundjavës për këtë arsye.
Ndeshja që fillon prej orës 20:45 është e para për Izraelin prej se nisi lufta në Lindjen e Mesme. Rrjedhimisht vlerësohet ndeshje shumë e ndjeshme.
Se sa e ndjeshme do të jetë ndeshja ishte lehtë e kuptueshme edhe të shtunën rreth stadiumit “Fadil Vokrri” dhe brenda këtij objekti sportiv. Masat e sigurisë janë të rrepta si asnjëherë më parë. Asnjë person nuk ka mundur t’i afrohet stadiumit pa u kontrolluar detajisht. Janë kontrolluar të gjithë gazetarët dhe të tjerët që ishin në konferencën për shtyp të Përfaqësueses së Kosovës.
Policia ka njoftuar për disa prej masave të sigurisë që do të ndërmerren në ditën e ndeshjeve, por edhe gjatë gjithë periudhës së qëndrimit të Përfaqësueses së Izraelit në Kosovë.
Kosova kishte barazuar 1:1 në udhëtim ndaj Izraelit dhe tani kërkon pikë. Megjithatë, fitorja nuk do të jetë mision i lehtë për Kosovën. Pos kapitenit Rrahmani, Përfaqësueses i mungojnë edhe lojtarë të tjerë të rëndësishëm si Edon Zhegrova, Arbër Zeneli, Betim Fazliji e disa të tjerë.
Nuk dihet se si do të jetë atmosfera në stadium dhe si do të ndikojnë masat shumë të rrepta të sigurisë në Përfaqësuesen e Kosovës. Por motivi për sukses te Kosova nuk do të mungojë.
