Kryeministri në detyrë Albin Kurti, për katër vjet i ka shërbyer përçarjes politike ndërshqiptare.
Kështu deklaroi nënkryetarja e LDK-së, Doarsa Kica-Xhelili, e cila reagoi pas ftesës që kryeministri në detyrë Albin Kurti, i drejtoi kreut të LDK-së Lumir Abdixhiku për konsultime para seancës konstituive të Kuvendit të Kosovës.
Përmes një postimi në Facebook ajo ka shkruar se “ai që synon të përçajë shqiptarët, s’mund t’i bashkojë e unifikojë as në paqe e as në krizë”.
“Katër vite, kryeministri në detyrë i ka shërbyer përçarjes politike ndërshqiptare. VV-ja është rast tipik i një partie që ngritet vetëm mbi ndasi, e prandaj s’mbijeton dot pa gjetur fajtorë të jashtëm. Kurtit për 4 vite, nuk i konvenoi asnjë politikan opozitarë shqiptarë. E tani, kur iu mbyll dera nga forcat më të mëdha politike shqiptare, ai po mundohet ta fshehë izolimin e vet politik pas tymnajës së akuzave për ndikime të jashtme. Herë ja zëmë rrugën ne, herë KQZ, herë PZAP… e akoma më shpesh vet rendi kushtetues. Pasi ofendoi, shau e izoloi bashkëpunimin politik ndër-shqiptarë, krijoi pozicionin kur qeveria jetëshkurtër që ai synon u reduktua në biseda pazaresh. Kosova e pasluftës nuk mban mend diskurs të tillë përçarës. E kush synim politik ka t’i përçajë shqiptarët, nuk mund t’i bashkojë e unifikojë as në paqe, e as në krizë”, ka shkruar Kica-Xhelili.
Edhe deputeti i zgjedhur i Lidhjes Demokratike të Kosovës (LDK), Alban Zogaj, ka reaguar pas ftesës.
Zogaj ka akuzuar Kurtin për hipokrizi politike dhe e ka cilësuar ftesën e tij si një shfaqje dëshpërimi.
“Albin Kurti e ndërtoi të gjithë mandatin e tij të kaluar mbi gjuhë përçarëse, mbi sulmet ndaj opozitës dhe me arrogancë të tejskajshme politike. Sot ai e ka sjellë veten dhe qeverisjen e ardhshme në pozitën më të dobët të mundshme, ku varet nga kushdo që është i gatshëm të bëj pazar me të”, tha Zogaj, duke sugjeruar se Kurti tashmë po kërkon mbështetje të fragmentuar për të siguruar një shumicë parlamentare.
Ai theksoi se Kosova ka nevojë për një qeveri që bashkon dhe qeveris me dinjitet, jo për një qeveri që mbijetojnë nëpërmjet marrëveshjeve të fshehta politike.
“Kosova NUK ka nevojë për qeveri që mbahet në këmbë me pazare, por për lidership që bashkon, dëgjon dhe qeveris me dinjitet”, përfundoi Zogaj.
Tentativat e Kurtit për të bërë qeveri, a do ta pranojë LDK-ja ftesën për takim?
