Kosova pritet t’i ketë rreth 1.6 milionë banorë, shifra këto të dala nga procesi i regjistrimit të popullsisë i cili ka përfunduar më 24 maj.
Avni Kastrati ushtrues detyre i drejtorit të Agjencisë së Statistikave të Kosovës, të hënën në një konferencë për media ka thënë se rezultatet preliminare të procesit synojnë t’i publikojnë në mesin e muajit korrik, kurse ato përfundimtare pas gjashtë muajve.
Ai ka thënë se ligji ia mundëson ASK-së që të dhënat të publikohen një vit pas procesit të regjistrimit dhe se ka raste kur ato publikohen edhe pas 15 muajve.
“ASK-ja sipas ligjit ka kohë që të publikojë të dhënat preliminare në fund të muajit gusht, do të mundohemi që të dhënat të publikohen më herët, pritjet janë që të dhënat paraprake të publikohen në mesin e muajit korrik”.Praktikat janë që të dhënat finale publikohen një vit pas datës së regjistrimit. Planifikojmë t’i publikojmë pas gjashtë muajve. ka thënë Kastrati, përcjell teve1.info.
Sa i përket pjesëmarrjes së komuniteteve jo shumicë në procesin e regjistrimit, Kastrati ka thënë se ata kanë marrë pjesë në mënyrë masive, përjashto komunitetin serb në katër komunat veriore, që sipas kreut të ASK-së i janë përgjigjur pjesërisht këtij procesi.
