Gjatë ditës, për këtë kërkesë kanë folur edhe nga Qeveria e vendit, por që nuk thonë nëse do të ketë shtyrje ose jo. Por, ka lënë të nënkuptohet se deri te vendimi ka edhe 10 ditë afat.
“Ne i kuptojmë shqetësimet dhe brengat e përfaqësuesit amerikan për Ballkanin Perëndimor, z. Gabriel Escobar dhe i ndajmë po ato me të, sepse siguria e paqja janë vlera dhe interes jetik e i përbashkët. Njëkohësisht, ne kemi për obligim sundimin e ligjit, kushtetutshmërinë, vendimet qeveritare. Njëra nuk bën ta përjashtojë tjetrën. Nuk është data 31 e as 30 tetor sot”, thuhet në përgjigjen e Qeverisë.
Profesori universitar Milazim Krasniqi, thotë se qeveria duhet ta shtyjë vendimin për targat, në harmoni me kërkesën e amerikanëve.
“Në kohën kur flitet për një proces që çon drejtë një marrëveshje finale, është absurde të koncentrohet dikush në çështjen e tabelave. Prandaj propozimi i Escobar është shumë i drejtë, shumë i logjikshëm dhe shumë i dobishëm dhe si i tillë do të duhej të pranohej. Në rast se Qeveria refuzon, atëherë rrezikon që më datën 31 tetor të ketë incidente dhe konflikte ne veri, dhe kjo gjë do t’i duhej si oksigjen Serbisë”, vlerësoi Krasniqi.
Para disa ditësh, edhe ambasadori i SHBA-së në Kosovë, Jeff Hovenier kërkoi që vendimi për targat të shtyhet. Një kërkesë të ngjashme ambasadorit pati pasur edhe për çështjen e letërnjoftimeve. Atë kohë qeveria e patri plotësuar kërkesën amerikane, çka edhe bëri që situata në veri të qetësohet.
Kurti takon të premten edhe opozitën, kur edhe mund të kërkojë një mbështetje më të gjerë politike para se të vendosë rreth kërkesës amerikane.
Kronika e gazetarit Valmir Gallopeni.
