Kombëtarja e Kosovës në basketboll ka pësuar humbje në ndeshjen e dytë në kuadër të parakualifikimeve për Kupën e Botës 2027. Pas triumfit ndaj Irlandës në Prishtinë të enjten, Kosova të shtunën pësoi nga Azerbajxhani.
Në ndeshjen e luajtur në Baku, Azerbajxhani triumfoi me rezultatin 87:77. Në fakt, Azerbajxhani e siguroi fitoren vetëm në çerekun e fundit, në të cilin edhe e bëri shkëputjen në rezultat pasi ndeshja ishte e barabartë në tri periudhat e para.
Çerekun e fundit, Azerbajxhani e fitoi me shifat 28:17 për ta siguruar fitoren e parë në këto parakualifikime. Periudha e parë (19:19) dhe e treta (16:16) ishin të barabarta, ndërsa Kosova arriti ta fitoj periudhën e parë (25:24) por kjo epërsi nuk i mjaftoi për ta fituar ndeshjen.
Orhan Haciyeva me 27 pikë e 11 kërcime, ishte më efikasi te Azerbajxhani, ku me lojë të mirë u veçua edhe i natyralizuari Donta Hall (20 pikë, 14 kërcime).
Te Kosova, tre basketbollistë e përfunduan ndeshjen me pikë dyshifrore. Më i dalluari ishte qendra Dardan Kapiti me 19 pikë, 6 kërcime e 4 asistime. U veçua edhe Musab Mala me 16 pikë e 6 asistime, ndërsa Dardan Berisha shtoi 20 pikë por që nuk mjaftuan për ta evituar humbjen.
Ndeshjet e radhës në kuadër të kësaj faze parakualifikuese, Kosova i luan në muajin nëntor të këtij viti.
