Qendra Kinematografike e Kosovës ka njoftuar se filmi “Mua besoj më shpëtoi portreti” nga regjisori kosovar Alban Muja do të ketë premierën botërore në Festivalin Ndërkombëtar të Filmit Berlinale.
Sipas njoftimit filmi 10-minutësh është pjesë e seksionit prestigjioz Forum Expanded dhe trajton tema të mbijetesës, qëndresës dhe fuqisë transformuese të artit gjatë Luftës së Kosovës.
“Njëzet e pesë vjet pas rrëmbimit të tij gjatë Luftës së Kosovës, piktori Skender Muja rrëfen një histori mbijetese të jashtëzakonshme. Në muajt e fundit kaotikë të luftës, Muja dhe shumë qytetarë shqiptarë nga Mitrovica u kapën ndërsa përpiqeshin të largoheshin nga Kosova. Të ndaluar në një shkollë të përshtatur si qendër ndalimi, ata u përballën me frikë, izolim dhe një fat të pasigurt. I rrëfyer nga vetë Muja, filmi ndërthur reflektimet e tij mbi fuqinë transformuese të artit me rikrijime dramatike të përvojës së tij. “Mua besoj më shpëtoi portreti” është një dëshmi e qëndrueshmërisë, duke ilustruar se si krijimtaria mund të shfaqet si një mjet mbijetese edhe në kushtet më shtypëse”, bëhet e ditur në njoftim.
Filmi thuhet se është prodhuar nga 038STUDIO në Prishtinë, në bashkëprodhim me AsfaltFilms nga Amsterdami dhe është mbështetur nga Qendra Kinematografike e Kosovës.
“Ky projekt është një dëshmi e fuqisë së bashkëpunimit ndërkombëtar dhe një hap i rëndësishëm për industrinë kinematografike kosovare”, theksohet në njoftim./teve1.info/
