Ministria e Financave ka nënshkruar një marrëveshje granti në vlerë prej 5 milionë euro me Bankën Gjermane për Zhvillim (KfW), për financimin shtesë të projektit “Zhvillimi i sektorit të energjisë – Faza VII: Përmirësimi i Rrjetit të Transmetimit”.
Sipas Ministrisë së Financave, projekti do të zbatohet nga Operatori i Sistemit, Transmisionit dhe Tregut të Energjisë Elektrike të Kosovës (KOSTT) dhe synon zhvillimin e mëtejshëm të infrastrukturës së transmisionit të energjisë elektrike në vend.
Ky financim do të mbështesë investimet për modernizimin e rrjetit të transmetimit, rritjen e sigurisë dhe besueshmërisë së furnizimit me energji elektrike, si dhe avancimin e integrimit të tregut energjetik.
Ministri i Financave, Hekuran Murati, vlerësoi bashkëpunimin me KOSTT-in dhe theksoi se financimi shtesë i siguruar nga Qeveria Gjermane përmes KfW-së do të ndihmojë në realizimin e investimeve prioritare dhe në forcimin e qëndrueshmërisë së sistemit energjetik të Kosovës.
Nga ana tjetër, drejtori i KfW-së për Kosovë, Moritz Remé, riafirmoi gatishmërinë e institucionit që përfaqëson për të vazhduar mbështetjen ndaj Kosovës në modernizimin e sektorit të energjisë.
Edhe kryeshefi ekzekutiv i KOSTT-it, Trim Tërnava, bëri të ditur se projektet janë duke u realizuar sipas planifikimit, ndërsa financimi i ri do të krijojë mundësi për zhvillimin e mëtejshëm të rrjetit të transmetimit dhe forcimin e sigurisë së sistemit elektroenergjetik.
Marrëveshja është pjesë e bashkëpunimit të vazhdueshëm ndërmjet Kosovës dhe Gjermanisë për zhvillimin e sektorit të energjisë dhe përmirësimin e infrastrukturës energjetike në vend.
