Kombëtarja e Kosovës në futboll, të enjten do t’i mësoj kundërshtarët në edicionin 2024/25 të Ligës së Kombeve.
Shorti për këtë garë, do të tërhiqet të enjten prej orës 18:00 në Paris dhe pjesë e tij do të jetë edhe Kosova. Megjithatë, ky short nuk e gjen Kosovën në momentin më të mirë të saj, pasi aktualisht është pa selektor dhe pa stadium, gjithashtu.
Stadiumi “Fadil Vokrri” në Prishtinë është mbyllur për shkak të rinovimit të fushës, ndërsa ka shpresa do të hapet në shtator kur edhe luhen ndeshjet e para të Ligës së Kombeve.
Kosova në short do të jetë në vazon e dytë, së bashku me Azerbajxhanin, Bullgarinë dhe Ishujt Faroe, përfaqësuese të cilat nuk do t’i ketë kundërshtare. Kundërshtarët e “Dardanëve” do të jenë nga vazoja e parë, e tretë dhe e katërt.
Në vazon e parë të Ligës C janë Rumania, Suedia, Armenia e Luksemburgu. Vazon e tretë e përbëjnë Maqedonia e Veriut, Sllovakia, Irlanda e Veriut dhe Qipro.
Ndërsa, Bjellorusia, Letonia dhe Lituania apo Gjibraltari do të jenë në vazon e katërt.
Për Kosovën, ky është edicioni i tretë rresht që paraqitet në Ligën C të kësaj gare, ndërsa debutoi në edicionin 2018/19 kur garoi në Ligën D.
Në këtë edicion të Ligës së Kombeve, Kosova do t’i luaj gjashtë ndeshje, dy në shtator, dy në tetor dhe dy në nëntor.
Për Kosovën, ky short i Ligës së Kombeve vjen pasi nuk arriti të kualifikohet në “Euro 2024”. Kosova, tashmë ka caktuar tri ndeshje miqësore për t’u përgatitur për edicionin e ri të Ligës së Kombeve.
Të trija ndeshjet, Kosova i luan në udhëtim, ndërsa do të përballet me Armeninë e Hungarinë në fund të muajit mars kurse me Norvegjinë do të luaj në fillim të muajit qershor.
Krahas Kosovës, në shortin e Ligës së Kombeve, do të jetë edhe Kombëtarja e Shqipërisë që tashmë ka siguruar pjesëmarrjen në Evropianin e këtij viti.
Shqipëria do të garoj në Ligën B të Ligës së Kombeve dhe në short është në vazon e tretë së bashku me Slloveninë, Irlandën e Malin e Zi.
