Të enjten pasdite në Kopenhagë të Danimarkës është tërhequr shorti i fazës kryesore kualifikuese për Kampionatin Evropian për hendbollistë, Euro 2026.
Në këto kualifikime do të paraqitet edhe Kombëtarja jonë.
Kosova është në grupin e gjashtë së bashku me Holandën, Ishujt Faroe dhe Ukrainën. Grupi është sfidues por Kombëtarja jonë e synon kualifikimin historik në Evropian.
Dy të parët në grup kualifikohen në Euro 2026 e po ashtu katër kombëtaret më të mira prej tetë grupeve sa janë gjithsej.
Ndeshjet zhvillohen prej tetorit të këtij viti deri në maj të vitit të ardhshëm.
Shorti përcaktoi fillimisht Serbinë në Grupin 6, pjesë e të cilit është edhe Kosova. Por shorti u përsërit dhe Serbia më pas ra në grupin 4. EHF-ja nuk lejon duelet e Kosovës me Serbinë.
Evropiani i ardhshëm për hendbollistë mbahet në Danimarkë, Suedi dhe Norvegji, përfaqësueset e të cilave vende kualifikohen direkt. Njëjtë është kualifikuar vetëm edhe kampionia në fuqi, Franca. Përmes kualifikimeve përcaktohen 20 përfaqësueset e tjera. Pra prej 32 përfaqësueseve pjesëmarrëse kualifikohen 20.
Kualifikimet zhvillohen në tetë grupe me nga katër përfaqësuese. Në Evropian shkojnë përfaqësueset e vendeve një e dy në secilin grup, si dhe katër përfaqësueset më të mira të vendit të tretë.
