Kosova e ka fituar ndeshjen e dytë të Grupit 5 të Ligës C të Ligës së Kombeve për futbolliste. Pas barazimit pa gola me Bullgarinë më 26 shtator, të udhëhequrat e përzgjedhëses Anneli Andersen të premten mposhtën në udhëtim Maqedoninë e Veriut me rezultatin 2:0.
Ndeshja u zhvillua në “Qendrën Stërvitore të Federatës së Maqedonisë së Veriut” në Shkup. Kosova fitoren e vulosi që në pjesën e parë. Sulmuesja e krahut, Valentina Limani, me lëvizje të bukur dhe gjuajtje të fortë e të saktë në minutën e 20-të të ndeshjes, i dha epërsinë skuadrës së Kosovës.
Ndërkohë, mesfushorja Valentina Metaj, realizoi nga afërsia, katër minuta para se skuadrat të shkonin në pushim. Në pjesën e dytë, Kosova nuk lejoi befasi, e administroi mirë lojën dhe i siguroi pikët e plota.
Kjo ishte ndeshja e dytë e zhvilluar në këtë grup. Kosova dhe Bullgaria në dy ndeshje kanë nga katër pikë.
E fundit është Maqedonia e Veriut, pa pikë. Edhe ndeshjen e radhës, “Dardanet” e luajnë kundër Maqedonisë së Veriut. Më 31 tetor takohen në stadiumin “Fadil Vokrri” në Prishtinë.
Ndeshjen e fundit, Kosova e luan kundër Bullgarisë më 1 dhjetor. Ky takim vlerësohet të jetë edhe vendimtar për ta fituar Grupin C të Ligës së Kombeve. Fituesit e pesë grupeve në Ligën C, inkuadrohen në Ligën B. Liga C është niveli më i ulët i Ligës së Kombeve.
Marrin pjesë skuadrat e renditura nga vendi i 33-të e më poshtë. Kosova te futbollistet në UEFA zë pozitën e 39-të, ndërsa në FIFA renditet në vendin e 102-të.
