Në sallë, disa herë brenda javës erdhën deputetët e opozitës.
Por Kuvendi i Kosovës ende mbetet i pakonstituuar për këtë legjislaturë.
Partia fituese, Lëvizja Vetëvendosje nuk po e thërret seancën për konstituim pa një marrëveshje politike për çështjen e presidentit.
E përpjekje gjatë kësaj jave për një marrëveshje të tillë ka bërë me Lidhjen Demokratike të Kosovës.
Por edhe pas katër ditëve nga takimi, ende nuk ka sinjale.
“Ndonëse partitë, në veçanti Lëvizja Vetëvendosje dhe Lidhja Demokratike e Kosovës në vazhdimësi kanë përmendur nevojën dhe urgjencën për formimin e institucioneve, përkatësisht arritjen e marrëveshjes për çështjen e presidentit, ndonëse kemi arritur gati në një javëshin e parë gati që nga takimi i fundit në mes të dy liderëve ende nuk ka asnjë drejtim, a thua se me të vërtetë partitë përkatëse kanë edhe aq shumë vendimmarrje për të diskutuar brenda strukturave sa i përket qoftë emrit apo parimeve specifike për zgjedhjen e presidentit. Në anën tjetër, situatë tjetër paradoksale është ajo me konstituimin potencial të Kuvendit jashtë afatit kushtetues”, deklaroi Eugen Cakolli nga Instituti Demokratik i Kosovës.
Për profesorin, Dashamir Bërxulli LDK-ja do të duhej ta vendoste të paktën një kusht për Vetëvendosjen.
“Pse zotëri Abdixhiku nuk e ka kushtëzuar uljen në tavolinën e bisedimeve pa u konstituuar Kuvendi i Kosovës. Me qenë se do të kishim kohë më shumë, po do të zgjedhim, jemi këtu por megjithatë konstituoni Kuvendin. Kjo gjë nuk ka ndodhur, kjo do të thotë që perceptimi i shumë njerëzve është se përtej krizës që ka ndodhur në kuptimin politik të fjalës LDK-ja i është nënshtruar vullnetit të Lëvizjes Vetëvendosje”, tha Bërxulli.
Të dyja partitë, Lëvizja Vetëvendosje dhe LDK, profesori Avdi Smajljaj thotë se do të duhej ta përfundonin dakordimin më me urgjencë.
“Shohim që partive nuk iu bëhet vonë, dy parti janë largu nga ky proces edhe PDK-ja edhe Aleanca, ndërsa tani ka mbete çështja te Vetëvendosje dhe LDK-ja edhe pse tani kemi hyrë përtej afateve kushtetuese shohim që këto dy parti po e marrin shumë me normalitet këtë kohë dhe nuk duket që e kanë me ngutje, sepse s’kemi pas as takime pas takimit të fundit që ishte sikur po harrojnë që i kanë kaluar afatet kushtetuese”, vlerësoi Smajlaj.
Lidhja Demokratike e Kosovës u tërhoq nga kërkesat e saj për Presidentin, pasi nuk arriti që të gjej një dakordim me Vetëvendosjen për ndarjen e pushtetit.
LDK i ka ofruar 18 votat e saj për një President konsensual.
