Konstituimi i Kuvendit të Kosovës dhe formimi i Qeverisë së re të dielën, më 13 shtator, janë vlerësuar si lajm i mirë nga analistët në emisionin “Ditari” në Tëvë1.
Profesori Artan Nimani ka thënë se aktgjykimi i Gjykatës Kushtetuese përcakton se, nëse ekziston kuorumi i nevojshëm, Kryesia e Kuvendit mund të konsiderohet e konstituuar.
Ndërkohë, vendimin e Partisë Demokratike të Kosovës (PDK), e cila të hënën i është drejtuar Gjykatës Kushtetuese me kërkesë për vendosjen e një mase të përkohshme ndaj Kuvendit të ri, derisa të shqyrtohet nëse konstituimi i tij është bërë në përputhje me Kushtetutën, Nimani e ka cilësuar si të duhur.
Kuvendi i Kosovës u konstituua të dielën pa zgjedhjen e nënkryetarit të dytë, post që i takon PDK-së.
Deputetët e kësaj partie nuk morën pjesë në seancë, duke e akuzuar pushtetin për shkelje të procedurave gjatë procesit të konstituimit.
“Në plan të parë, mendoj se është bërë një hap i mirë, sepse këtë konstituim e ka kërkuar edhe vetë PDK-ja çdo ditë. Aktgjykimi i Gjykatës Kushtetuese e ka përcaktuar se, nëse ka kuorum, Kryesia e Kuvendit mund të konsiderohet e konstituuar. Pastaj, nëse ka shkelje apo probleme rreth afateve kohore për konstituimin e Kuvendit, po ashtu ka bërë mirë PDK-ja që e ka dërguar lëndën në Gjykatën Kushtetuese”, ka deklaruar Nimani.
Sipas tij, çështjet institucionale duhet të zgjidhen përmes institucioneve përkatëse dhe aktgjykimet e Gjykatës Kushtetuese duhet të respektohen.
“Ne duhet të mësojmë njëherë e përgjithmonë që t’i respektojmë institucionet dhe të mos e luajmë rolin që e ka luajtur qeveria deri tash, që të mos i njohë aktgjykimet e Gjykatës Kushtetuese, por t’i njohë rezultatet të cilat i kanë prodhuar këto institucione”, është shprehur ai.
Nimani ka theksuar se tashmë çështja është në duart e Gjykatës Kushtetuese, e cila, sipas tij, mund të vendosë për pezullimin e procesit apo të ndërmarrë masa nëse konstaton se ka pasur shkelje.
Ai ka përmendur edhe dy interpretimet lidhur me afatin për konstituimin e Kuvendit: atë të opozitës, sipas së cilës Kuvendi duhet të konstituohet brenda 30 ditësh nga certifikimi i rezultateve të zgjedhjeve, dhe interpretimin e Lëvizjes Vetëvendosje, sipas të cilit afati prej 30 ditësh llogaritet nga fillimi i procesit.
“Unë mendoj se është dashur dhe do të duhej që Kosova gjithsesi ta ketë të konstituuar Kuvendin, për shkak të 16 shtatorit”, ka deklaruar Nimani.
Edhe analisti Burim Korqa e ka vlerësuar si lajm të mirë konstituimin e Kuvendit dhe formimin e Qeverisë së re.
“Është një lajm i mirë konstituimi i Kuvendit, e në veçanti kur jemi para një vendimi shumë të rëndësishëm të Gjykatës së Hagës, i cili është peshë shumë e madhe për shtetin dhe popullin e Kosovës”, ka thënë Korqa.
Sipas tij, formimi i Qeverisë është i rëndësishëm në mënyrë që institucionet e Kosovës të mund të reagojnë zyrtarisht, pavarësisht se cili do të jetë vendimi i 16 shtatorit.
“Është mirë që edhe Qeveria e Kosovës është formuar, në mënyrë që, çfarëdo që të jetë vendimi i 16 shtatorit, ata të reagojnë edhe në aspektin zyrtar”, ka deklaruar Korqa.
Edhe Korqa e ka konsideruar të drejtë vendimin e PDK-së për t’iu drejtuar Gjykatës Kushtetuese.
“PDK-ja do të duhej ta bënte këtë, për shkak se që nga fillimi, kur nuk është konstituuar Kuvendi më 6 apo 7 gusht, ata kanë thënë se është shkelur Kushtetuta. Prandaj, mendoj se do të duhej që menjëherë ta dërgonin në Gjykatën Kushtetuese”, ka thënë ai.
Megjithatë, Korqa ka vlerësuar se edhe PDK-ja, sikurse partitë e tjera, mund të ketë kalkuluar politikisht, duke marrë parasysh zhvillimet dhe datën 16 shtator.
“Megjithatë, është lajm shumë i mirë që tani i kemi institucionet. Se a janë të ligjshme dhe a është shkelur Kushtetuta apo jo, atë do ta thotë Gjykata Kushtetuese”, ka përfunduar Korqa.
Ndryshe, Kuvendi i Kosovës u shpall i konstituuar të dielën paradite, pasi u zgjodhën nënkryetarët nga radhët e LDK-së dhe komuniteteve pakicë.
Kryetarja dhe nënkryetari i parë nga LVV-ja ishin zgjedhur në seanca të mëparshme të të mërkurën dhe premten, përkatësisht.
PDK-ja nuk mori pjesë në seancë dhe paraprakisht e kishte tërhequr kandidaturën e Vlora Çitakut për nënkryetare, kur LVV-ja nuk ia kishte votuar në seancën e të premtes.
LVV kishte thënë të shtunën vonë se do ta votonte Çitakun. Por, PDK nuk pranoi të merrte pjesë.
Kryetarja e Kuvendit, Albulena Haxhiu, tha se Kuvendi “nuk mund të mbetet peng i askujt, i asnjë subjekti politik”, dhe e vazhdoi procesin.
Kandidati i LDK-së për nënkryetar, Kujtim Shala, u zgjodh me 75 vota.
Pas tetë kandidaturave të dështuara nga Lista Serbe, u zgjodh edhe deputetja serbe Tanja Vujoviq. Ajo mori votat e LVV-së dhe të disa deputetëve të LDK-së.
Nga komunitetet joserbe u zgjodh deputetja boshnjake Emilija Rexhepi.
Pas votimit të nënkryetarëve, Haxhiu deklaroi se Kuvendi “konsiderohet i konstituuar”.
Në një vendim të mëhershëm, Gjykata Kushtetuese kishte lënë të hapur mundësinë që Kuvendi, në rrethana të caktuara, të funksionojë edhe pa një nga anëtarët e Kryesisë, nëse zgjedhja e tij pamundësohet dhe Kryesia ka kuorum për vendimmarrje.
Si një rrethanë e tillë ishte përmendur rasti kur një deputet ose grup parlamentar që ka të drejtë të propozojë anëtar të kryesisë nuk e ushtron këtë të drejtë ose e pengon procesin./teve1.info/
