Më 8 shkurt përcaktohen kundërshtarët e ardhshëm të përfaqësueses së Kosovës në futboll. Bëhet fjalë për edicionin e katërt të Ligës së Kombeve të UEFA-s, shorti i së cilës garë tërhiqet në Paris.
Ndeshjet e para janë prej 5 deri më 7 shtator e të dytat prej 8 deri më 10 shtator. Dy ndeshje janë në tetor e dy të tjera në nëntor.
Rumania, Suedia, Armenia e Luksemburgu janë në vazon e parë. Maqedonia e Veriut, Sllovakia, Irlanda e Veriut dhe Qipro në vazon e tretë, ndërsa Bjellorusia, Estonia, Letonia dhe Lituania apo Gjibraltari në vazon e katërt.
UEFA ka bërë disa ndryshime për edicionin e katërt të Ligës së Kombeve. Ka përfshirë fazë çerekfinale për Ligën A. Sa i takon Ligës C, katër fituesit e grupeve promovohen në Ligën B. Ndërkohë vetëm dy prej katër përfaqësueseve më të dobëta në grupe në Ligën C, bien në Ligën D. Dy të tjerat luajnë në plejaut.
Nëse përfundon e dyta në grup, Kosova do të luajë në plejof për promovim në Ligën B. Deri më tani kjo mundësi nuk ishte. Vetëm fituesi i grupit avanconte në nivel më të lartë, ndërsa skuadra e dytë nuk kishte mundësi shtesë.
Liga e Kombeve është krijuar me idenë për të shmangur miqësoret për përfaqësueset evropiane. Natyrisht edhe të hyrat financiare për UEFA-n dhe federatat nacionale janë më të mëdha për shkak të numrit më të madh të ndeshjeve garuese.
Edicioni i ri i Ligës së Kombeve ka lidhshmëri me kualifikimet për Kupën e Botës 2026. Katër përfaqësueset më të mira në Ligën e Kombeve e që nuk kualifikohen në Botëror përmes kualifikimeve të rregullta do të paraqiten në plejof, me 12 përfaqësueset që në kualifikime të rregullta përfundojnë në pozitën e dytë në grup. Ka pak gjasë që kjo të ketë ndikim në Ligën C, ku është Kosova.
Në edicionin e parë të Ligës së Kombeve (2018/19), Kosova kishte fituar grupin në Ligën D. Kështu ishte promovuar në Ligën C dhe kishte fituar rastin për kualifikim në “Euro 2020”, që nuk e shfrytëzoi. Në grup kishte lënë prapa Azerbajxhanin, Ishujt Faroe dhe Maltën, derisa në plejof ishte mposhtur nga Maqedonia e Veriut. Mbetet humbja më e hidhur e Kosovës deri më tani.
Në edicionin 2020/21, Kosova u rendit e treta në grup në Ligën C. Mbeti prapa Sllovenisë e Greqisë, ndërsa ishte mbi Moldavinë.
Në edicionin 2022/2023, Kosova ishte në grupin 2 të Ligës C. Këtë grup e fitoi Greqia me 15 pikë, që edhe u promovua në Ligën B. Kosova u rendit e dyta me nëntë pikë, ndërsa Irlanda e Veriut dhe Qipro i kishin nga pesë pikë.
FFK-ja ende nuk e ka caktuar selektorin e ri të Kosovës. Ndërkohë në mars e në qershor Kosova pritet të luajë ndeshje miqësore.