Është gjykatë e Kosovës, me seli në Hagë.
Në të nën pretendimet për krime lufte, ka pesë vjet që po gjykohet katërshja e UÇK-së.
Por, provat që së fundmi i pranoi trupi gjykues, erdhën nga shteti kundër të cilit luftoi pikërisht kjo katërshe.
Kjo meqë prokuroria e speciales, paraqiti si prova materiale, dokumente të dorëzuar nga institucionet e Serbisë.
E shqetësuar për këtë, u shpreh e para e drejtësisë në Kosovë, Albulena Haxhiu.
“Ky zhvillim është thellësisht i papranueshëm. Institucionet në fjalë janë struktura të një regjimi që ka qenë përgjegjës për dhunë sistematike, krime lufte, zhdukje me forcë, gjenocid, spastrime etnike dhe represion brutal ndaj popullit të Kosovës. Pranimi i materialeve të prodhuara nga ky regjim si burime të besueshme përbën një deformim të rëndë të drejtësisë dhe një fyerje të hapur ndaj viktimave të luftës dhe sakrificës për liri”, ka shkruar Haxhiu.
Sipas Haxhiut, ky veprim nga Dhomat e Specializuara, ngre dyshime serioze mbi paanshmërinë e vetë gjyqtarëve të rastit.
E monitoruesit e speciales, thonë se provat mund të pranohen nga cilido shtet.
Por më pas secila nga to do të vlerësohet veç e veç.
“Në mesin e këtyre provave të propozuara nga Zyra e Prokurorisë, ka pasur edhe prova të cilat burojnë nga institucione të ndryshme të Serbisë të cilat gjykata në vendimin e marrë i ka pranuar si të pranueshme në këtë fazë. Sipas ligjit dhe procedurës së provave, nuk është e ndaluar që provat të pranohen nga cilido shtet, qoftë Serbia apo cilido shtet tjetër, por sigurisht që besueshmëria dhe kredibiliteti i këtyre provave të pranuara në këtë fazë, do të vlerësohen nga trupi gjykues secila veç e veç, dhe në fund do të shohim në rast se trupi gjykues do t’u jap ndonjë peshë këtyre provave të pranuara në fazë”, shprehet Amer Alija monitorues nga Fondi për të Drejtat Humanitare.
Për këtë çështje, Tëvë1 ka dërguar pyetje edhe në Gjykatën Speciale.
Por të njëjtit nuk kanë kthyer përgjigje të enjten.
