Savo Stefranoviq, po dyshohet se ka kryer krime gjatë luftës së fundit në Kosovë, konkretisht pjesëmarrje në vrasjen e 33 personave në rajonin e Pejës.
I akuzuari është arrestuar në bazë të një urdhër arresti ndërkombëtar të lëshuar nga Përfaqësuesi Special i Sekretarit të Përgjithshëm të Kombeve të Bashkuara në Kosovë.
Gjykata hungareze ka kërkuar nga Kosova që të dërgojnë një kërkesë për ekstradim dhe se dokumentet duhet të mbërrijnë brenda datës 26 nëntor të këtij viti.
“Në përputhje me rregullat e së drejtës ndërkombëtare, autoritetet hungareze mund të hetojnë vetëm nëse, sipas të dhënave dhe informacioneve ekzistuese, janë plotësuar kushtet për ekstradim. Gjykata hungareze kërkoi nga autoritetet e Kosovës që të dërgojnë një kërkesë për ekstradim dhe të japin informacione të mëtejshme. Dokumentet e kërkuara duhet të mbërrijnë brenda datës 26 nëntor 2022, pasi skadon afati i paraburgimit për ekstradim”, tha Rab Ferenc Levente, zëvendëszëdhënësi i Prokurorisë Metropolitane të Budapestit.
Njohësit e çështjeve juridike, tregojnë për rrugën ligjore që duhet ta ndjek Kosova për këtë rast.
Avokati Ylli Zekaj, thotë se Ministria e Drejtësisë ka 40 ditë kohë ta dërgojë kërkesën për ekstradim, në rast se Stefranoviq shpallet i fajshëm.
Ndërsa avokati, Artan Qerkini, tregon edhe disa procedura të tjera që kërkon Hungaria për ta ekstraduar një person.
Dyshimet janë se në periudhën kohore 26 mars deri më 28 maj 1999, personi në fjalë ka marrë pjesë aktivisht në kryerjen e veprave penale që ndërlidhen me krimet e luftës në Kosovë.
Kronika e gazetarit Shpat Blakçori.
