Që nga qershori i vitit të kaluar, Kosova është nën masat ndëshkuese nga Bashkimi Evropian.
Me peticionin e nisur së fundmi për shkarkimin e kryetarëve të komunave veriore, janë përmbushur kërkesat e ndërkombëtarëve për t’u hequr këto masa.
Një gjë të tillë, po e kërkon edhe zv.kryeministri Besnik Bislimi i cili thotë se është e pakuptimtë pse kjo nuk ka ndodhur ende.
“Është shumë e rëndësishme që Bashkimi Evropian sa më shpejt t’i tërheqë masat represive ndaj Kosovës, pasi Kosova ka përmbushur kërkesat bazë para vendosjes së masave dhe kemi një situatë të qetë dhe përmes heqjes së masave, atëherë i gjithë fokusi kthehet në avancimin e integrimit evropian të Kosovës…17:38 Ka paqartësi brenda vendeve anëtare, se cili është mekanizmi për largimin e masave, por ka presion dhe frustrim edhe brenda vendeve anëtare se si ka mundësi që Kosova është nën masa vetëm pse ka dërguar katër kryetar komunash në zyrat e tyre që i kanë fituar përmes zgjedhjeve legjitime. Ndërsa, Serbia nuk ka masa edhe për shkak të agresionit terrorist që ka bërë në Banjska. Pra ka një qasje krejtësisht të pa balancuar të Bashkimit Evropian dhe një qasje që ka dëmtuar vendin tonë”, thotë Bislimi.
Edhe njohësi i çështjeve politike, Fidan Ukaj vlerëson se Kosova i ka përmbushur detyrat e saj për largimin e masave të tilla. Teksa shpreson se të njëjtat të mos përdoren ndaj vendit për implementimin e marrëveshjeve të tjera.
Kurse, politologu Argjned Zejnaj thotë se pasojat për vendin nga këto veprime të BE-së tashmë janë të dukshme.
Derisa tregon edhe hapat që duhet ndërmarrë nga vendi për largimin e këtyre masave.
Deri te këto masa kishte ardhur pas zgjedhjes së kryetarëve të rinj shqiptarë në komunat veriore e ku serbët lokalë kishin protestuar, gjë që ishte dashur edhe ndërhyrja e njësive Speciale të Kosovës.