Pas fitores së arritur në Larnaca ndaj Qipros 2:0, është trimëruar Përfaqësuesja e Kosovës që tani synon fitoren e dytë rresht në Ligën C të Ligës së Kombeve. Kosova këtë të dielë (sot) do të përballet me Greqinë në stadiumin “Fadil Vokrri” nga ora 20:45 në kuadër të grupit të dytë.
Ky do të jetë një ballafaqim i dy skuadrave të para të grupit të dytë në Ligën C. Përzgjedhësi i Kosovës, Alain Giresse ka nënvizuar se synon ta dominojnë Greqinë njëashtu si ndaj Qipros. Por edhe mysafirët nënvizuan se nuk vijnë duar-kryç, pasi trajneri i tyre Gustavo Poyet po pret rezultat pozitiv.
Kosova në Ligën C2 është e para aktualisht me tri pikë, falë goldallimit më të mirë. E ka një gol më shumë të shënuar sesa Greqia, që fitoi 1:0 ndaj Irlandës së Veriut në udhëtim në ndeshjen e parë.
Por Kosova edhe më 9 qershor luan në shtëpi sërish, por ndaj Irlandës së Veriut. Ndeshjet e këtij muaji i mbyll në udhëtim te Greqia më 12 qershor.
Kampanjën e tretë të Ligës së Kombeve mbyllet në muajin shtator me ndeshjet në udhëtim tek Irlanda e Veriut dhe në shtëpi kundër Qipros.
Liga e Kombeve e këtij edicioni vlerësohet një tjetër rast i artë për Kosovën për ta synuar Evropianin e vitit 2024, si dhe promovimin në Ligën B të Ligës së Kombeve. /Tëvë1/
