Kombëtarja e Kosovës dhe ajo e Shqipërisë në futboll, pritet të kenë ngritje në ranglistën e FIFA-s për muajin tetor.
FIFA do të publikojë renditjen e re, zyrtarisht më datën 23 tetor kurse rezultatet e mira të “Dardanëve” dhe “Kuqezinjve”, janë vendimtarë për ngjitjen në këtë ranglistë.
Si Kosova ashtu edhe Shqipëria, do të ngjiten për pesë pozita në renditjen e re, ndonëse “Dardanët” pritet të vendosin rekord.
Shqipëria pritet të jenë në pozitën e 61-të, ndërsa Kosova në vendin e 86-të, renditje këto që përcaktojnë ndarjen e vazove për shortin e play-offit të Botërorit 2026.
Në dy ndeshjet kualifikuese të këtij muaji, Kosova barazoi 0:0 me Slloveninë në Prishtinë dhe mposhti Suedinë 1:0 në Goteborg, ndërsa Shqipëria triumfoi 1:0 në Leskovc ndaj Serbisë.
Të dyja kombëtaret, muajin tjetër luajnë dy ndeshjet e fundit të kualifikimeve ku pritet të ruajnë pozitat e dyta në grup për t’u paraqitur në play-off.
