Federata Evropiane e Hendbollit ka publikuar të mërkurën ranglistën e ekipeve përfaqësuese për periudhë katërvjeçare.
Ranglista u publikua pas përfundimit të Kampionatit Botëror të hendbollistëve, të cilin e fitoi Danimarka.
Sa i takon Kosovës, pozitë më të mirë ka përfaqësuesja e hendbollisteve.
Renditet në vendin e 26-të në Evropë me 17,25 pikë, që i mblodhi me rezultate në kualifikimet për katër ngjarjet e mëdha.
Prapa Kosovës është edhe Rusia, por që momentalisht është e suspenduar nga garat ndërkombëtare. Prapa janë edhe përfaqësuese si Ishujt Faroe, Finlanda, Izraeli, Luksemburgu, Bosnjë-Hercegovina, Lituania, Letonia, Azerbajxhani, Bullgaria, Britania e Madhe dhe Qipro. 11 vende evropiane janë në fund të listës, por pa pikë në mungesë të garave.
Norvegjia është e para te hendbollistet, e përcjellë nga Franca, Danimarka, Suedia e Holanda.
Me Suedinë, njërën prej përfaqësueseve më të mira në botë, Kosova luan pas dy muajsh.
Te hendbollistët, përfaqësuesja e Kosovës është e 35-ta me 14 pikë.
Letonia, Rusia (e suspenduar), Qipro, Bullgaria, Bjellorusia (e suspenduar), Britania e Madhe, Moldavia, Azerbajxhani, Irlanda e Malta janë prapa Kosovës. Në listë janë 50 përfaqësuese, katër prej tyre pa pikë pasi nuk u paraqitën në kualifikime.
E para është kampionia botërore, Danimarka, kurse pas saj janë Franca, Gjermania, Suedia e Kroacia.
Ekipet përfaqësuese të Kosovës në hendboll kanë pasur rezultate solide në vitet e fundit.
