Shpërndarja e propagandës nga vendet e rajonit po vlerësohet rrezik për demokracinë.
E kjo po bëhet përmes kanaleve televizive të mbështetura nga Rusia me seli edhe në Serbi.
Kjo po prek edhe Kosovën, që sipas Katarina Klingova, hulumtuese në institutin GLOBSEC për dezinformata në Sllovaki, Beogradi zyrtar po mbulon media të afërta pro-Kremlin.
“Propaganda pro-Kremlin po shpërndahet në rajon nga lajmëtarët në rajon, me akterët kryesorë që janë RT, Sputnik, ‘agjencia e lajmeve’ NeësFront. Shumë nga to janë të vendosura në Serbi. Versioni serb i Sputnikut, që ka lansuar edhe televizion, është burim i madh i dezinformatave dhe propagandës pro-Kremlin në rajon. Ofrimi i fondeve për mediat lokale, është mënyrë për të luftuar dezinformatat. Kontrolli nga qeveria, mendoj, a ka ndërhyrje nga Rusia? Po, patjetër”, tha Klingova.
Ndërkaq eksperti i luftimit të dezinformatave dhe propagandës nga Britania e Bashkuar, Ben Graham, thotë se trendi i kësaj dukurie është shqetësues.
“Roli im është më shumë për të shikuar dezinformatat në rrafshin global, dhe çfarë shohim globalisht janë sfida shumë serioze, sa i përket besimit në institucione, sfida shumë serioze edhe ruajtjen e integritetit të informacioneve që po sfidohen gjatë zgjedhjeve. Prandaj secili shtet duhet të mendojë si të mbrojmë proceset tona demokratike”, tha Graham.
Graham për Tëvë1 shtoi se në Kosovë ka organizata që janë duke monitoruar përhapjen e dezinformatave.
“Çfarë di është se ka shumë organizata të jashtëzakonshme me të cilat kam pasur rastin të flisja këtu në Kosovë, të cilat bëjnë një punë interesante në ruajtjen e integritetit të informacionit në mënyra të ndryshme, dhe besoj se ato janë në pozitën më të mirë, sa i përket çështjes në Kosovë”, tha ai.
Shqetësim për këtë ka ngritur edhe Bashkimi Evropian dhe Shtetet e Bashkuara të Amerikës të cilët para zgjedhjeve në Kosovë kanë bërë thirrje të ngritët vigjilenca në aspektin e sigurisë pasi që, propaganda po shpërndahet me shpejtësi e që cenon edhe sigurinë në vend.
