Kjo është bërë e ditur në një konferencë për medie nga ministrja e Drejtësisë së Kosovës, Albulena Haxhiu dhe homologu i saj nga Shqipëria, Ulsi Manja.
Dy ministrat u zotuan se do të zbatojnë marrëveshjet e arritura nga mbledhjet e përbashkëta të dy Qeverive që kanë të bëjnë me fushën e drejtësisë.
Albulena Haxhiu tha se bashkëpunimi me Shqipërinë është shumë i rëndësishëm.
“Ministria e Drejtësisë është e nderuar që ka nisur punimet me Ministrinë e Drejtësisë së e Shqipërisë më qëllim të realizimit të zotimeve tona që lidhen me arritjen e një marrëveshje për njohjen e zbatimit të dënimeve alternative”, ka thënë Haxhiu, shkruan teve1.info.
Ajo ka paralajmëruar se shumë shpejt do të finalizohet marrëveshja për njohjen reciproke të Provimit të Jurisprudencës.
“Si dhe tre nisma tjera të cilave u garantohet reciprociteti në lejimin e ushtrimit të profesionit të avokatit, po ashtu edhe të ndërmjetësuesit si dhe njohja e ndërsjellë e Provimit të Jurisprudencës. Prej momentit që kam marrë detyrën si ministre kam jashtëzakonisht kërkesa dhe jemi dakorduar që këtë proces ta përmbyllim sa më shpejtë”, tha Haxhiu.
Kurse, ministri i Drejtësisë së Shqipërisë, Ulsi Manja, tha se ata janë të vendosur që të zbatojnë marrëveshjet e nënshkruara, ndërsa shtoi se nuk ka asnjë pengesë që këto marrëveshje të zbatohen.
“Takimi i sotëm është shprehje e qartë e vullnetit të përbashkët i të dy ministrive për të quar përpara të gjitha marrëveshjet që kemi nënshkruar në mbledhjet e përbashkëta të dy qeverive. Shumë shpejtë do të kemi marrëveshjen për dënimet alternative. Do ta konkretizojmë shumë shpejt edhe njohjen reciproke të Provimit të Jurisprudencës”, tha ai./teve1.info/
