Sulmuesit serbë të arrestuar nga Policia e Kosovës, pas aktit terrorist në Banjskë të Zveçanit pritet ta vuajnë dënimin në institucionet korrektuese të Kosovës. Njohësit e fushës konsiderojnë se edhe në rast të një arritjes të një marrëveshje politike për ekstradim, transferimi i tyre në Serbi është i pamundur për shkak të kornizës ligjore që ka Serbia.
Gjykata e Krimeve të Rënda në Prishtinë, të martën, ua ka caktuar masën e paraburgimit me nga një muaj tre të arrestuarve në fshatin Banjskë të Zveçanit.
Ata dyshohen si pjesëtarë të grupit kriminal që planifikuan dhe shkaktuan sulm terrorist ndaj pjesëtarëve të Policisë së Kosovës.
Meqë mes vendit tonë dhe Serbisë nuk ka marrëveshje për bashkëpunim juridik ndërkombëtar, Këshilli për Mbrojtjen e të Drejtave dhe Lirive të Njeriut konsideron se të njëjtit pritet ta vuajnë dënimin në institucionet korrektuese të Kosovës.
“Në fatkeqësi mund të themi, Kosova nuk ka marrëveshje për ekstradimin e personave të burgosur ose paraburgosur me Serbinë. Besoj që përderisa vepra është kryer brenda territorit të Kosovës, personi, në rast se i caktohet masa e paraburgimit dhe burgimit, dënimet do ti vuajë në institucionet korrektuese të Kosovës”, tha Përgjegjësja për programe në KMDLNJ, Valentina Demolli.
Edhe në rast se arrihet marrëveshje politike për ekstradimin e tyre në Serbi, njohësi i çështjeve ligjore Anton Nrecaj thekson se kjo është e pamundur për shkak të kornizës ligjore që e ka Serbia.
“Nëse i referohemi kornizës ligjore që e ka Serbia, Kushtetuta e Rep. Të Serbisë, akoma e parasheh Kosovën si pjesë të saj. Për të pasur një marëveshje të tillë, ata duhet ta ndryshojnë Kushtetutën. Kështu që këta qytetarë të cilët janë deklaruar që janë qytetar të Rep. të Serbisë do t’i nënshtrohen një procesi gjyqësor këtu dhe epilogun do ta marrin këtu. Potencialisht edhe vuajtjen e dënimit, duhet ta bëjnë dhe do ta bëjnë këtu në Kosovë”, tha njohësi i qështjeve ligjore, Anton Nrecaj.
Presoni i tretë ndaj të cilit iu është caktuar masa e paraburgimit, po vazhdon trajtimin në Qendrën Klinike Universitare, pasi u plagos në shkëmbim zjarri me Policinë e Kosovës.
