Ministrja e Industrisë, Ndërmarrësisë, Tregtisë dhe Inovacionit, Mimoza Kusari-Lila, ka pritur në takim një delegacion nga Omani, me të cilin ka diskutuar mundësitë e thellimit të bashkëpunimit ekonomik ndërmjet dy vendeve, me fokus në investime, inovacion dhe zhvillimin e bizneseve.
Delegacioni nga Omani u udhëhoq nga Sheikh Abdulaziz bin Abdullah bin Zahir Al-Hinai, ambasador i posaçëm i Ministrisë së Punëve të Jashtme të Omanit. Në përbërje të tij ishin edhe MaluLlah bin Mahmoud Al-Belushi, ambasador i Omanit në Budapest, si dhe Mohamed Abdullah Bathir Al-Kindi, këshilltar në Ministrinë e Punëve të Jashtme të Omanit.
Gjatë takimit u shqyrtuan mundësitë për tërheqjen e investimeve të reja dhe krijimin e partneriteteve ndërmjet bizneseve të Kosovës dhe Omanit. Delegacioni oman shprehu gatishmërinë për të mbështetur bashkëpunimin ekonomik, me synimin që diskutimet të konkretizohen në iniciativa të përbashkëta në të ardhmen.
Ministrja Kusari-Lila prezantoi gjithashtu mundësitë që ofron Marrëveshja e Tregtisë së Lirë me EFTA-n për bizneset kosovare, veçanërisht në zgjerimin e eksporteve dhe qasjen në tregjet ndërkombëtare, përfshirë sektorin e shërbimeve.
Në takim u theksua edhe rëndësia e zgjerimit të partneriteteve ekonomike me vendet e Lindjes së Mesme, përfshirë shtetet anëtare të Këshillit të Bashkëpunimit të Gjirit (GCC), me qëllim krijimin e mundësive të reja për investime dhe avancimin e bizneseve të Kosovës në tregjet ndërkombëtare.
Takimi synon të kontribuojë në forcimin e marrëdhënieve ekonomike ndërmjet Kosovës dhe Omanit, si dhe në identifikimin e mundësive konkrete për bashkëpunim në fusha me interes të përbashkët.
