Përmes njoftimit, MPJD bëri të ditur se temë kryesore e këtij diskutimi ishte nevoja për thellimin e mëtejshëm të raporteve mes dy vendeve në sferat me interes.
“Takimi filloi me falënderimin e Ministres Gërvalla për mikpritjen në Forumin Ekonomik në Delphi, të zhvilluar javën e kaluar, i cili u vlerësua nga ana e saj si shumë i përzemërt dhe i
dobishëm për rajonin në përgjithësi, dhe në veçanti për Republikën e Kosovës. Temë kryesore midis dy delegacioneve ishte nevoja për thellimin e mëtejshëm të raporteve midis Republikës së Kosovës dhe Republikës së Greqisë në të gjitha sferat me interes për popujt e të dyja vendeve, sidomos në ekonomi, tregti, arsim, kulturë e turizëm”, thuhet ndër tjerash në njoftim.
Po ashtu, pjesë diskutimi ishte edhe situata e krijuar pas agresionit ushtarak rus në Ukrainë si dhe rreziqet për rajonin.
“Ministrja Gërvalla përsëriti se Republika e Kosovës dhe populli i saj solidarizohet me Ukrainën dhe dënon invazionin rus. Kosova, tha ajo, mbështet integritetin territorial, sovranitetin dhe pavarësinë e Ukrainës, dhe qysh në fillim është rreshtuar përkrah aleatëve të saj, duke iu bashkangjitur sanksioneve të Bashkimit Evropian dhe Shteteve të Bashkuara të Amerikës. Duke folur për rreziqet që mund të ketë rajoni nga agresioni ushtarak rus ndaj Ukrainës, Ministrja Gërvalla theksoi se përkrahja e vazhdueshme e Serbisë ndaj aleatit të saj, Rusisë, edhe në këtë rast, kërkon një mesazh dhe pozicionim të qartë të BE-së”, njoftoi tutje MPJD./teve1.info/.