Kosova është asociuar zyrtarisht me Qendrën Evropiane për Qëndrueshmëri Demokratike (ECDR), së bashku me vendet kandidate për anëtarësim në Bashkimin Evropian.
Lajmin e ka bërë të ditur kryenegociatori i Kosovës me BE-në, Jeton Zulfaj, përmes një postimi në Facebook.
Ai ka falënderuar Presidencën irlandeze të BE-së, Komisionerin Michael McGrath dhe Komisioneren Marta Kos për përfshirjen e Kosovës në këtë nismë.
Zulfaj ka theksuar se Kosova synon të jetë jo vetëm pjesëmarrëse, por edhe të propozojë dhe të udhëheqë projekte konkrete në kuadër të Qendrës, duke vënë në dispozicion përvojën e saj në përballjen me kërcënimet ndaj proceseve demokratike.
Ai ka bërë të ditur se Kosova është përballur me operacione të huaja informative që kanë synuar zgjedhjet demokratike dhe marrëdhëniet ndërmjet komuniteteve, ndërsa institucionet kanë ndërmarrë masa për forcimin e sigurisë kibernetike, qeverisjes digjitale, edukimit mediatik dhe gazetarisë së pavarur.
Sipas Zulfajt, asociimi me Qendrën krijon mundësi për bashkëpunim me shtetet anëtare të BE-së dhe vendet kandidate në fusha si menaxhimi i krizave, matja e qëndrueshmërisë demokratike, zhvillimi i standardeve të përbashkëta dhe trajnimi profesional.
Gjatë fjalës së tij, kryenegociatori ka ngritur edhe shqetësimet për kërcënimet hibride në rajon, duke përmendur ndikimin informativ rus dhe praninë e mediave shtetërore ruse në Beograd.
Ai gjithashtu ka kritikuar veprimet dhe deklaratat e zyrtarëve serbë, të cilat i cilësoi si kërcënime për sigurinë dhe stabilitetin rajonal.
Zulfaj është shprehur se qëndrueshmëria demokratike kërkon identifikimin e hapur të kërcënimeve dhe bashkëpunim të përbashkët për t’iu kundërvënë atyre.
Në përfundim, ai ka theksuar se Kosova i bashkohet kësaj nisme si partnere, e gatshme të kontribuojë me përvojën e saj dhe të bashkëpunojë me vendet e tjera për mbrojtjen e demokracisë dhe forcimin e sigurisë në Evropë./teve1.info/
