Kosova është pranuar si anëtare me të drejta të plota në Asociacionin Rajonal të Rregullatorëve të Energjisë (ERRA), në kuadër të Asamblesë së Përgjithshme të mbajtur më 28 prill në Bratislavë.
Sipas njoftimit të Zyrës së Rregullatorit për Energji (ZRRE), ky anëtarësim përbën një arritje institucionale, pasi i mundëson Kosovës pjesëmarrje të plotë në vendimmarrje, përfshirë edhe të drejtën e votës, si dhe një rol më aktiv në zhvillimin e praktikave rregullatore në nivel rajonal dhe ndërkombëtar.
ZRRE thekson se ky zhvillim pasqyron angazhimin e vazhdueshëm në përmbushjen e standardeve ndërkombëtare në sektorin e energjisë, si dhe kontributin e ekspertëve të saj në iniciativa dhe forume profesionale të ERRA-s.
Tutje, bëhet e ditur se përmes këtij anëtarësimi do të intensifikohet bashkëpunimi me rregullatorët ndërkombëtarë, me synim avancimin e politikave dhe mekanizmave që garantojnë një sektor energjetik më të sigurt.
