Shqipëria ka hapur zyrtarisht edhe grupkapitullin e fundit në procesin e negociatave me Bashkimin Europian, një hap kyç që e afron vendin edhe më pranë anëtarësimit të plotë.
Komisionerja për Zgjerimin, Marta Kos, vlerësoi punën e bërë nga institucionet shqiptare, duke theksuar se ky progres është rezultat i përkushtimit të autoriteteve shqiptare për zbatimin e reformave thelbësore europiane.
“Sot është një ditë e veçantë jo vetëm për Shqipërinë që mbyll apo hap kapitull por edhe për BE sepse sot tregon se BE ofron rezultate dhe të mbështetemi tek Shqipëria në të ardhmen, ky sukses nuk mund të ishte i mundur pa angazhimin e patundur politik të Shqipërisë dhe nga angazhimi i fortë i të gjitha shteteve anëtare për të mbështetur ecurinë e Shqipërisë. I jam mirënjohëse presidencës daneze për përpjekjet që bëri të mundur këtë. Jemi të përkushtuar ta sjellim Shqipërinë në BE. Suksesi i Shqipërisë është rezultat i punës së autoriteteve shqiptare, me shoqërinë civile dhe me aktorë të tjerë për zbatimin e reformave të rëndësishme të BE dhe rezultati i qytetarëve shqiptar që kërkojnë ndryshimin dhe i mbështesin këto ndryshime”, u shpreh Kos.
Komisionerja nënvizoi se integrimi evropian është një proces që sjell ndryshime reale në politikë, ekonomi dhe në shoqërinë shqiptare, duke e bërë vendin gjithnjë e më afër standardeve europiane.
Ajo e cilësoi Shqipërinë “shembullin më të mirë të fuqisë transformuese që ka zgjerimi i BE-së”, raporton rtsh.al
Ajo shtoi se hapi i radhës për Shqipërinë është përmbushja e piketave për secilin kapitull, proces që, siç u shpreh, “nuk është gjithmonë i lehtë”, por i domosdoshëm për të çuar vendin drejt anëtarësimit të plotë në Bashkimin Evropian.
“Reformat e BE sjellin ndryshime në sistemin politik, në ekonomi po kështu edhe në shoqërinë shqiptare duke e bërë atë vërtet evropiane për rrjedhojë Shqipëria është shembulli më i mirë i fuqisë transformuese e zgjerimit. Kjo tregon se kur jepni rezultate ecni përpara, jeni frymëzim për shumë në Ballkanin Perëndimor. Çelja e të gjithë grup kapitujve është një sukses i jashtëzakonshëm por mbyllja e tyre është çmimi real. Suksesi juaj do të përcaktohet se sa mirë dhe sa shpejt miratoni dhe zbatoni legjislacionin evropian. Është momenti për të përshpejtuar sidomos në reformat në drejtësi, pavarësia gjyqësore dhe lufta kundër korrupsionit. Dhe hapi tjetër është që Shqipëria të përmbushë piketat dhe nuk është gjithmonë e lehtë”, tha ajo.
