Ish-deputeti i Kuvendit të Kosovës, Visar Korenica ka deklaruar se vendimi i ShBA-së për pezullimin e dialogut strategjik me Kosovën është një lajm shqetësues për vendin.
Korenica thotë se duhet urgjentisht që Kosova me ndryshua strategjinë e bashkëpunimit dhe koordinimit në aspektin diplomatik, duke shtuar se Kosova themelet i ka ndërtuar me një aleancë të fuqishme me ShBA-të.
Ai ka përmendur edhe BE-në e cila i ka dërguar sinjale Kosovës që të ndryshojë në veprime të cilat e rregullojnë gjendjen e përgjithshme të qytetarëve të Kosovës.
“Absolutisht është një lajm shumë shqetësues për vendin tonë, duke ditur se vendi ynë themelet i ka ndërtuar me një aleancë të fuqishme me ShBA-të dhe aty ku jemi sot të lirë dhe duke u përpjek me marrë rrugën pa kahen e një vendi të zhvilluar është falë vendimmarrjes së drejtpërdrejt ndaj ShBA-së për të na çliruar një herë e përgjithmonë nga armiku ynë që është Serbia. Duhet urgjentisht me ndryshua strategjinë tonë karshi bashkëpunimit dhe koordinimit të punëve tona në rrafshin diplomatik të jashtëm, konsideroj që dëmi do të jetë jashtëzakonisht i madh fatkeqësisht. Edhe BE-ja ka dërguar sinjale që raporti i Kosovës me BE-në duhet të ndryshojë, të jetë më aktiv i koordinuar në kuptimin që të kem veprime të cilat e rregullojnë gjendjen e përgjithshme të qytetarëve të Kosovës”, ka deklaruar Korenica në emisionin “Ditari” në Tëvë1.
Ndërkohë, ish-deputeti ka theksuar se opozita do ta përdorë këtë vendimin e ShBA-së për ta goditur qeverinë në detyrë.
Ndryshe, Korenica ka lënë fajtore edhe opozitën e cila nuk ka gjetur gjuhë të përbashkët për themelimin e institucioneve.
“Opozita do ta përdorë këtë vendim për ta goditur qeverinë në detyrë, unë konsideroj që nuk është fajtore vetëm Qeveria në detyrë, por edhe opozita e cila nuk ka gjetur gjuhë të përbashkët që të ecë përpara qoftë me themelimin e institucioneve sepse zgjedhjet e fundit na kane treguar që partia fituese nuk ka numër të mjaftueshëm për të themeluar institucionet dhe të njëjtën kohë kemi parë që edhe opozita nuk ka kohezion përbrenda për të themeluar institucionet edhe pse ka numër më të madh të deputetëve në Kuvend”, theksoi në fund ish-deputeti./teve1.info/
