Meriton Korenica ka shënuar golin e parë me fanellën e ekipit të ri, Steaua në kampionatin e Rumanisë.
Megjithatë, skuadra e tij barazoi 2:2 ndaj Petrolulit në kuadër të xhiros së nëntë të Superligës rumune.
Korenica është shprehur i kënaqur me golin por jo edhe rezultatin e ndeshjes pasi ka insistuar se kanë merituar plotësisht fitoren në këtë përballje.
Ai kaloi ekipin e tij në epërsi 2:1 me golin që e shënoi në minutën e 24-të, i cili erdhi shtatë minuta më vonë pas goditi traversën në këtë ndeshje që ishte startues dhe luajti deri në minutën e 80-të.
“Merituam më shumë se një barazim por ky do të jetë një mësim për ndeshjen e ardhshme që na pret në kampionat. Kemi cilësi në ekip dhe ndihmen shumë mirë këtu. Dua të jap 100 për qind në çdo ndeshje me këtë fanellë”, ka thënë Korenica që ka 1 gol e 1 asistim në 7 paraqitje këtë sezon në kampionat.
Ai te Steaua u transferua nga Cluji, skuadër kjo për të cilën luajti dy sezone dhe ishte ndër lojtarët më të dalluar.
