Studentët e Universitetit “Fan S. Noli” në Korçë kanë vijuar edhe sot bojkotin e procesit mësimor, në kuadër të protestave të zhvilluara ditët e fundit. Në mbështetje të tyre janë bashkuar edhe një pjesë e pedagogëve të këtij universiteti.
Ndërkohë, në Shkodër, pedagogët e Universitetit “Luigj Gurakuqi” i janë bashkuar bojkotit të organizuar nga Sindikata e Punonjësve të Universiteteve, në mbështetje të protestës së studentëve.
Anëtari i kryesisë së sindikatës ka bërë të ditur se rreth 70–80 për qind e pedagogëve të këtij universiteti kanë mbështetur vendimin për bojkot. Sipas kryetarit lokal të degës së sindikatës në Shkodër, bojkoti po respektohet nga shumica e stafit akademik.
Sipas vendimit të Sindikatës së Punonjësve të Universiteteve, bojkoti do të vijojë pa afat, deri në plotësimin e kërkesës kryesore të studentëve: dorëheqjen e kryeministrit Edi Rama.
