Shtesat të cilat parashiheshin që mësimdhënësit të merrnin përmes kontratës kolektive, i shkaktuan dëme miliona euro komunës së Drenasit.
Mbi 3 milionë euro u detyrua që kjo komunë t’u japë mësimdhënësve, të cilët kishin deponuar padi në organet e drejtësisë.
E kjo pamundësoi përfundimin e disa projekteve kapitale në këtë komunë.
“Në komunën e Drenasit vetëm në vitin e kaluar kemi paguar rreth 3.6 milionë euro, ka ndikuar jashtëzakonisht keq edhe në projektet kapitale duke dëmtuar dhe duke lënë në gjysmë ose pa filluar ende”, thotë Muhamet Gjoka – drejtor i Arsimit në Drenas.
Por jo vetëm në Drenas, kontrata kolektive deri në vitin e kaluar ua mori komunave të Kosovës mbi 125 milionë euro.
Kurse për dy muajt e këtij viti, shuma shkon mbi 35 milionë euro.
“Vetëm në këto dy muajt e parë të këtij viti komunat iu janë dërguar faktuarat mbi 35 milionë euro, për zbatimin e kontratës kolektive, ku nga këto 35 milionë euro 10 milionë euro do t’i shkojnë përmbaruesve dhe neve gjatë takimeve që kemi pas me nivelin qendror i kemi paraqitur këto shifra në detaje mirëpo qeveria nuk ka marrë asnjë hap sa i përket zgjidhjes së këtij problemi”, thotë Sazan Ibrahimi nga Asociacioni i Komunave të Kosovës.
E për këtë, të martën ka reaguar ministri i Financave, Hekuran Murati, i cili kritikoi Prokurorinë për mos nisjen e hetimeve.
Por nga Sindikata e Bashkuar e Arsimit barrën për këtë ia hedhin Qeverisë Kurti.
“Duke e pasur parasysh deklaratën e ministrit i cili ka thënë që po bëhen dëme dhe prokuroria duhet të bëjë hetime atë që ka bërë këto shkelje, fillimisht në qeveritë e kaluar disa prej pikave të kontratës kolektive kanë qenë në zërat buxhetorë dhe komuna kanë filluar të paguajnë mirëpo në qeverinë e fundit me ministrin Murati janë hequr kjo linjë buxhetore komunave dhe barra iu ka kaluar Gjykatave deri të përmbarimit. Nëse do të duhej të fillonte hetimi, do të duhej që nga qeveria, ministri i Financave të shihet pse janë bërë këto shpenzime pa pasur nevojë”, thotë Blendor Shatri- zyrtar ligjior në SBASHK.
Kontrata kolektive parasheh disa përfitime financiare për punonjësit e arsimit – nga pagesa për shujtat ushqimore apo për shpenzimet e udhëtimit deri te paga shtesë pas pensionimit.
