Afër 60 leje ndërtimore u lëshuan vetëm gjatë këtij viti në komunën e Prishtinës.
Prej tyre, objekte shumë-banesore, sportive, arsimore e individuale.
Megjithatë në trajtimin e këtyre lejeve ndërtimore, ndërtuesit duhet të presin gati një vit për të filluar punën e tyre.
“Për arsye të ndryshme kemi mos të them neglizhencë por zhagitje të përgjigjeve ndoshta edhe për shkak të problemeve që ka me parcela, po flas për objekte kolektive kryesisht. Mesatarja e trajtimit të një leje të ndërtimit është diku 9-10 muaj në komunën e Prishtinës”, thotë Faton Hoxha nga Shoqata e Ndërtuesve të Kosovës.
Ndërsa sa i përket ndërtimeve pa leje, Hoxha thekson se numri i tyre është zvogëluar.
“Unë besoj që viteve të fundit jemi koxha mirë, ka kontroll të shtuar të ndërtimeve”, shtoi ai.
Megjithatë, ndërtimet pa leje i shohin me shqetësim edhe njohësit e ambientit.
“Është problematikë në nivel vendi që nga paslufta. Si rezultat i këtyre ndërtimeve, atëherë ne ballafaqohemi me dy problematika kyqe në nivel vendi. Kjo është mungesa e hapësirave të gjelbërta çdo herë më shumë dhe shëndeti publik ku njerëzit rrezikohen nga sëmundje të ndryshme duke mos ditë për pasojat në një të ardhme të afërt”, thotë Valentinë Uka, njohëse e ambientit
Mirëpo sipas arkitektëve, kriteret urbanistike nuk po përmbushen nga ndërtuesit.
“Ndërtimet pa leje edhe sikur të jenë objekte të bukura e ndoshta të mirë vendosura në lokacion, mbi 50% të standardeve urbanistike nuk i përfillin. Sigurisht që ndikojnë negativisht në infrastrukturë, ndotje të ambientit pasi nuk i përfillin normativat as për ujëra atmosferik, poashtu edhe për ujërat e zeza dhe ndikimeve tjera”, thotë arkitekti Drilon Mustafa
Tëvë1 kërkoi përgjigje edhe nga Ministria e Mjedisit dhe Planifikimit Hapësinor dhe komuna e Prishtinës lidhur me identifikimin e ndërtimeve pa leje, mirëpo gjatë ditës të njëjtit nuk kanë kthyer përgjigje.
