Kryetari i Kuvendit të Kosovës, Glauk Konjufca, gjatë pjesëmarrjes së tij në Samitin e Dytë për Demokraci në Uashington, ka takuar liderë të shteteve të ndryshme të botës, raporton teve1.info
Përmes një statusi në Facebook, Konjufca ka thënë se me përfaqësuesit e shteteve përkatëse ka diskutuar për avancimin e bashkëpunimit në fusha të ndryshme të interesit të përbashkët.
“Në margjina të Samitit të Dytë për Demokraci që po mbahet në Uashington, pata rastin të zhvilloj një sërë takimesh të frytshme me kryetarë të parlamenteve, deputetë, zyrtarë të lartë dhe personalitete nga Kenia, Gambia, Armenia, Gana, Zambia, Liberia dhe Kosta Rika, disa prej tyre shtete jonjohëse të Republikës së Kosovës.
Potencova progresin demokratik të Republikës së Kosovës dhe përkushtimin institucional në rrugën tonë drejt anëtarësimit në Bashkimit Evropian dhe në NATO. Me përfaqësues të këtyre shteteve biseduam për rolin e parlamenteve tona në ndërtim dhe intensifikim të marrëdhënieve dypalëshe dhe bashkëpunimit në fusha të ndryshme të interesit të përbashkët”, ka shkruar ndër të tjera Konjufca.
Kryeparlamentari ka thënë se ka shprehur përkushtimin e Republikës së Kosovës për kultivimin e miqësisë, zhvillimin e modaliteteve për bashkëpunim në të ardhmen dhe avancimin e raporteve ndërshtetërore me qëllim forcimin e pozitës ndërkombëtare të Kosovës.
