Me këtë rast, Konjufca e ka falënderuar Albright, MCC-në dhe Shtetet e Bashkuara të Amerikës për programin “Kompakt” që parasheh ndihmën mbi 200 milionë dollarëshe për ndërtimin e sistemeve akumuluese të energjisë në Kosovë, duke e cilësuar si projektin më të madh energjetik që nga paslufta.
“Projektet e MCC-së do të ndikojnë në pavarësinë energjetike të Kosovës, do të diversifikojnë burimet energjetike dhe do të mbështesin avancimin e grave në sektorin e energjisë”, ka thënë Konjufca.
Sipas një komunikate nga Kuvendi, Konjufca i ka siguruar drejtuesit e MCC-së se institucionet e Republikës së Kosovës, përfshirë Kuvendin, kanë qenë dhe do të jenë miq të MCC-së dhe gjithherë do t’i mirëpresin projektet që ata i realizojnë në Kosovë.
Në anën tjetër, Albright vlerësoi punën e mirë që ka bërë Kuvendi i Kosovës dhe shprehu gatishmërinë për të bashkëpunuar sa më ngushtë në ndryshimet e nevojshme legjislative për zbatimin e projekteve të MCC-së.
Konjufca dhe Kryeshefja e MCC-së u pajtuan për vazhdimin dhe thellimin e bashkëpunimit të ndërsjellë.
Në takim morën pjesë edhe Ambasadori i ShBA-së në Kosovë, Jeffrey Hovenier, Sarah Olmstead, Drejtoreshë e MCC për Kosovë, Caitlin Reichart, Zv.Drejtoreshë, Jonathan Brooks, Zv.President për Evropë dhe Dan Petrie, Shef i stafit të Alice Albright.
