Kryetari i Kuvendit të Kosovës, Glauk Konjufca, në pritjen shtetërore në rastin e 16-vjetorit të Pavarësisë së Kosovës, tha se dita e sotme shënon ditën më të rëndësishme të vendit tonë.
Konjufca tha se çdo përvjetor i pavarësisë së Kosovës, siç është edhe ky 16-vjetor, na bën krenarë si popull, që me sakrifica të panumërta më shumë se shekullore, ia dolëm të triumfojmë mbi pushtimin serb dhe mbi kohërat e rënda të së shkuarës.
Kryeparlamentari Konjufca, mes tjerash, përmendi edhe ish-drejtuesit e UÇK-së që, sikundër tha ai, padrejtësisht po mbahen në Hagë, për shkak se po ndodhen në një proces akuzash të pabazuara.
“Më lejoni që sot t’i kujtojmë edhe të gjithë ata luftëtarë të Ushtrisë Çlirimtare të Kosovës dhe anëtarë të Shtabit të Përgjithshëm të cilët e bënë luftën e lavdishme, më të lavdishme që një ushtri mund ta bëjë, siç është lufta jonë për çlirimin dhe lirinë e popullit tonë. UÇK-ja është emblema më e rëndësishme në historinë e Kosovës sonë të lirë dhe të pavarur. Dëshiroj që në ketë ditë historike t’i kujtojmë dhe t’i nderojmë edhe drejtuesit e luftës sonë çlirimtare që padrejtësisht nuk po mund të festojnë sot këtu me ne për shkak se ndodhen në një proces akuzash të pabazuara”.
Më tej Konjufca foli për mbështetjen e madhe të shteteve aleate që i kanë dhënë Kosovës në rrugëtimin e saj të çlirimit dhe të shtetndërtimit, duke u shprehur gjithmonë mirënjohës ë përkrahjen ndaj vendit tonë.
“Prandaj sot duke reflektuar për këtë histori, e duke e vlerësuar këtë rrugëtim, e themi me krenari, urime 17 Shkurti, Dita e Pavarësisë së Republikës së Kosovës. Lavdi të gjithë atyre që ranë për lirinë dhe pavarësinë e vendit tonë, falënderim e mirënjohje e veçantë aleatëve tanë. Rroftë Republika e Kosovës”, tha kryetari Glauk Konjufca.
