Zëvendëskryeministri i Parë dhe ministri në detyrë i Punëve të Jashtme dhe Diasporës, Glauk Konjufca, ka pritur të mërkurën në një takim lamtumirës ambasadoren e Mbretërisë së Holandës në Kosovë, Karin Boven.
Sipas njoftimit të MPJD-së, Konjufca e ka falënderuar ambasadoren Boven për angazhimin dhe bashkëpunimin gjatë mandatit të saj në Kosovë, si dhe për kontributin në forcimin e marrëdhënieve ndërmjet Kosovës dhe Holandës.
Gjatë takimit, Konjufca e ka vlerësuar Holandën si shtet mik dhe partner të rëndësishëm të Kosovës.
Ai ka theksuar gjithashtu rëndësinë e vazhdimit të bashkëpunimit ndërmjet dy vendeve, veçanërisht në proceset integruese, zhvillimin demokratik dhe fusha të tjera me interes të përbashkët.
“Zëvendëskryeministri Konjufca i uroi Ambasadores Boven suksese në angazhimet e saj të ardhshme”, theksohet në fund të njoftimit./teve1.info/
