Kryetari i Kuvendit, Glauk Konjufca, pas mbledhjes së Kryesisë së Kuvendit, është deklaruar në konferencë për media duke iu drejtuar BE-së me disa kritika.
Sa i përket draftit për Asociacionin, Konjufca tha se Bashkimi Evropian po e trajton Kosovën si jo shtet, duke thënë se qasja e BE-së është diskriminuese.
Sipas Konjufcës, Kosova duhet të mbrojë të drejtën e vetë deri në fund dhe të ulet me BE-në dhe të qartësojë deri në fund se kush e ka kompetencën.
Konjufca ka thënë se Kosova mund të jetë vonuar për draftstatutin e Asociacionit, por sipas tij, s’ka pasur periudhë kohore të caktuar.
“Kosovës i garantohet e drejta për me paraqit një draftstatut të Asociacionin. BE-ja mundet me na kritiku me thanë ‘jeni vonuar shumë’ por ne mund të themi se a ka pas afat?. Është qasje diskriminuese e BE-së që bën dhe e trajton Kosovën si jo shtet. Kosova duhet të mbrojë të drejtën e vetë deri në fund e të ulet me BE-në dhe të qartësojë deri në fund kush e ka këtë kompetencë, Kosova apo BE-ja. Unë mendoj se e Kosova. A jemi vonuar a s’jemi, ne ashtu kështu jemi nën masat e BE-së. Mjafton kjo me pagu çmimin që jemi vonuar”, ka thënë ai.
