Kryetari i Kuvendit të Kosovës, Glauk Konjufca, tha se një vit më parë e gjithë bota u shokua nga agresioni i paprovokuar i federatës ruse mbi popullin dhe shtetin e Ukrainës, raporton teve1.info
Në njëvjetorin e luftës së Ukrainës, Konjufca tha se gjatë këtij viti janë parë dëshmi të një qëndrese të paepur dhe shumë frymëzuese të popullit të Ukrainës kundër okupacionit rus.
“Edhe një herë historia po na tregon përmes ligësive të saj se ekzistojnë ende luftërat e drejta në botë e të cilat janë të domosdoshme.
Kjo është lufta e një populli paqedashës për liri, i cili është në gjendje t’i sakrifikoj të gjitha për këtë vlerë aq të çmuar.
Kosova, Republika jonë qëndron fuqishëm me Ukrainën dhe qysh kur lufta nisi, ky agresion dhe ky invazion i Rusisë kundër Ukrainës, Kosova menjëherë e ka dënuar këtë sulm të padrejtë e të patolerueshëm.
Në Kuvend e kemi miratuar edhe rezolutën e cila e shpreh gatishmërinë e Kosovës për strehimin e ukrainasve në vendin tonë e po ashtu edhe pranimin gazetarëve e që po bëni një punë të shkëlqyeshme edhe përkundër rrethanave shumë të vështira”, tha ndër të tjera Konjufca.
Konjufca tha se para 24 viteve, qytetarët e Kosovës ishin në këtë pozitë nga Serbia e cila sipas tij, as nuk ka kërkuar falje për krimet që i ka bërë.
“Para 24 viteve qytetarët e Kosovës ishin në këpucët tuaja, ne ishim me një regjim gjenocidal i cili vrau fëmijë e pleq dhe i cili shtet jo vetëm që i bëri të gjitha këto por kurrë nuk u distancua nga këto që i bëri.
I kemi të pasqyruara edhe më parë dhe kjo na sjell në mendje të njëjtin konspilacion që ishte në vitin 1998-99.
Do të qëndrojmë deri në fund me popullin ukrainas duke mos pas asnjë dyshim që fitorja do të vije në ditët në vijim”, tha Konjufca.
