Grupi Grave Deputete të Kuvendit të Republikës së Kosovës, ka thirrur seancë shënjuese me të gjitha ish-deputetet e legjislaturave të mëparshme të Kuvendit të Republikës së Kosovës.
Kryetari i Kuvendit, Glauk Konjufca, i cili është prezent në këtë seancë, na fjalën e tij hyrëse, u shpreh i gëzuar dhe i privilegjuar që ndodhet në mesin e tyre, teksa tha se në historinë e krijimit dhe konsolidimit të Kosovës si shtet sovran, janë të gravuar emrat e shumë grave që dhanë kontributin e tyre.
“Ndihem i gëzuar dhe jashtëzakonisht i privilegjuar që ndodhem së bashku me ju këtu, sepse në historinë e krijimit dhe konsolidimit të shtetit të Republikës së Kosovës si shtet sovran, janë të gravuar emrat e shumë grave që përgjatë etapave të ndryshme e dhanë kontributin dhe shembullin e tyre të jashtëzakonshëm. S’mund të flasim për progresin dhe sfidat e të tashmes sa i përket barazisë gjinore, pa e rikujtuar pikënisjen e proceseve madhore që na sollën deri këtu ku jemi. Pa u rikthyer në zanafillën e Kuvendit të Kosovës që daton këtu e 23 vite më parë”, deklaroi Konjufca.
Më tej, kryekuvendari tha se pavarësisht rrethanave të asaj kohe, duke marrë parasysh barrën e të qenit grua politikane, ato përsëri ishin këmbëngulëse në misionin që kishin përsipër.
“Nuk mund të mos e kujtojmë po ashtu vitin 1990 dhe 2 korrikun, kur 114 delegatët e Kuvendit të Kosovës, në mesin e tyre 18 gra deputete, para dyerve të këtij Kuvendi, të rrethuar nga forcat ushtarako policore të regjimit të atëhershëm serb, e miratuan deklaratën e lavdishme kushtetuese dhe e shpallën Kosovën Republikë. Ne kemi ecur në hapat e tyre, çdo veprimtar, çdo aktivist, të gjitha ato gra që dhanë kontributin e tyre kanë ecur në këtë rrugë dhe në këtë konsistencë. Iu përkulemi dhe i nderojmë në punën e tyre vetëmohuese, që pavarësisht të rrethanave të asaj kohe, bartës të të qenit grua politikane, ishin këmbëngulëse në misionin që e kishin përsipër”, potencoi tutje Konjufca.
Ndër të tjerash, Konjufca përmendi edhe deputeten Nekibe Kelmendi, të cilën e cilësoi si veprimtare e aktiviste politike e cila punoi për ndërtimin dhe të drejtën e shtetit të Kosovës.
“Në takime si ky i sotmi që po e bëjmë, s’mund të mos i kujtojmë edhe gratë e tjera intelektuale e aktiviste të palodhshme, që ishin aktive si në Lëvizjen për Liri, ashtu edhe në pavarësinë dhe zhvillimit e shtetit të Kosovës, por që s’janë në mesin tonë. Para se të gjithash më lejoni ta kujtojmë e ta nderojmë deputeten e Nekibe Kelmendi, një veprimtare edhe aktiviste politike e cila punoi me devotshmëri për ndërtimin e shtetit dhe të drejtës në shtetin tonë”, potencoi kryekuvendari.
Temë e kësaj seance është “Historia e deputeteve në Kuvendin e Kosovës – përparim dhe proces”./teve1.info/.
