Kryekuvendari, Glauk Konjufca, deklaroi se Lisa Serbe nuk mori asnjë sanksionim nga Shtetet e Bashkuara të Amerikës, për mospjesëmarrje në zgjedhjet lokale në komunat veriore.
Madje sipas tij, Qeveria Kurti ka ndjekur rrugën sipas porosive të ShBA-së.
“Lista Serbe nuk mori pjesë në zgjedhje, e për këtë gjë nuk morën asnjë sanksionim nga ShBA-të, asnjë qortim serioz. Siç po e shoh situatën unë, Qeveria po shkon në atë rrugë, për arsye se ashtu i ka lexuar porositë e ShBA-ve. Mendoj që kryefjala e situatës nuk është shqetësimi, as nuk është brengosja. Ashtu që të garantojnë qetësi dhe siguri në atë pjesë të vendit. Siç po shihet, atje krejt problemi po fillon dhe po përfundon me grupe të armatosura, të rrezikshme, të paligjshme, të cilat e sfidojnë shtetin dhe sulmojmë zyrtarët policorë. Nuk ua mundësojnë atyre kryerjen e detyrës të cilët e kanë me Kushtetutë”, shtoi Konjufca në mbledhjen e Kryesisë së Kuvendit.
Ndërkaq, i pyetur nga mediet në qoftë se kjo nënkupton që Kosova është duke i prishur raportet me ShBA-të, Konjufca tha se në këtë situatë Kosova është vetëm e keqkuptuar, përcjell teve1.info.
“E për tu mirëkuptuar duhet të ketë takime më intensive e më të thella”, theksoi tutje Konjufca./teve1.info/.
