Xhaferi e Konjufca kanë mbajtur një konferencë të përbashkët, ku ky i fundit ka folur për situatën me Ukrainën, me ç’rast ka përmendur se Kuvendi i Kosovës dhe ai i Maqedonisë së Veriut miratuan të njëjtën kohë rezolutën për Ukrainën në mbështetje të popullit të saj, shkruan Teve1.info.
“Roli i Parlamenteve tona është shumë i rëndësishëm. Kuvendi i Kosovës e miratoi në të njëjtën kohë me Kuvendin e Maqedonisë Veriut rezolutën për Ukrainën në mbështetje të popullit të Ukrainës i cili në mënyrë të pa provokuar po sulmohet padrejtësisht përmes agresionit ushtarak të federatës ruse dhe ky agresion po shkakton edhe shumë humbje të jetëve të civilëve të pafajshëm duke mos u kursyer as edhe fëmijët”.
“Ne jemi të përcaktuar dhe shumë të gëzuar që në të njëjtën kornizë po veprojmë me Maqedoninë e Veriut për të qenë plotësisht të përcaktuar për sanksionet të cilat e bashkimi evropian, NATO dhe shtetet më të fuqishme demokratike në krye me demokracinë më të fuqishme të botës SHBA-në po ia vendosin Federatës Ruse”, ka thënë Konjufca.
Sipas tij, Kosova dhe Maqedonia janë në të njëjtën linjë të përcaktimit pro perëndimor, pro demokratik dhe pro transatlantik
“Në kuadër të sanksioneve të cilat po e bashkojnë botën demokratike në mënyrë që të konfrontohet ky agresion i paprecedent rus”, tha Konjufca.
Ai tha se bashkëpunimi mes Kosovës dhe Maqedonisë së Veriut do të thellohet edhe më tutje.
“Bashkëpunimi jonë me Maqedonisë së Veriut do të thellohet edhe më tutje ne jemi aq shumë ti japim njëri tjetrit dhe jemi aq afër si fqinjë dhe kemi aq shkëmbime përpara për të kryer sa që kjo më bën optimist se vetëm duke qenë kështu më afër njëri tjetrit edhe rajoni është më i sigurt”, tha Konjufca. /teve1.info/