Konjufca komenton deklaratat e Osmanit: Të mos godasim nën brez

Kryetari i Kuvendit të Kosovës, Glauk Konjufca është deklaruar për adresimin e presidentes, Vjosa Osmani, në Kuvend.

Ai deklaroi se nuk do të thotë që duhet të ketë pajtim për çdo gjë, por kërkon që të kihet kujdes, të ruhet integriteti dhe të “mos goditet nën brez”.

“Sa i përket asaj e kam shprehur që ne nuk do të thotë që duhet të pajtohemi për çdo gjë në mënyrën se si shohim, sidomos për disa tema të caktuara që janë shumë specifike, ta zëmë: dialogu i Brukselit, çështja e Asociacionit, obligimet që i ka Kosova, në të gjitha këto mund të kemi dallime”, tha ai.

Konjufca tha se nuk e përjashton faktin që ndonjëherë edhe ai vet të ketë pasur dallime edhe me kryeministrin, Albin Kurti.

“Mirëpo, se si shprehemi mendoj se duhet ta kemi një kujdes të shtuar, sepse kur kritikojmë njëri tjetrin nuk duhet ta kritikojmë me goditje e sidomos me goditje nën brez, kjo është më e rëndësishmja. Kështu ia ruajmë edhe integritetin institucioneve tona edhe dinjitetin atyre. E kuptojmë që ndonjëherë për shkak të frustrimit, për shkak të mënyrës se si gjërat nuk shkojnë se si ne dëshirojmë, mund ta kemi ndonjë lloj mllefi, ndonjë lloj pezmi me njëri tjetrin, por unë mendoj që kështu e ruajmë shtetin tonë, duke e kritikuar njëri tjetrin në mënyrë humane, ashtu siç duhet, jo me goditje domosdoshmërish”, tha Konjufca për RTK-në.