Gjatë qëndrimit në Gjermani, kryetari i Kuvendit të Kosovës, Glauk Konjufca është takuar me kryetarin e Komisionit për Çështjet Evropiane në Bundestagun Gjerman, Anton Hofreiter.
Përmes një postimi në Facebook, Konjufca bën të ditur se e ka falënderuar Hofreiter për mbështetjen që Gjermania i ka dhënë Kosovës, ndër të tjerash për liberalizimin e vizave, përcjell teve1.info
Tutje ai ka thënë se Kosova është gjithnjë e hapur për thellimin e bashkëpunimit me Gjermaninë.
“Z. Hofreiter e falënderova për mikëpritjen dhe i shpreha mirënjohje për kontributin e tij, të komisionit që drejton dhe të shtetit gjerman ndaj Republikës së Kosovës, veçanërisht në çështjet e proceseve integruese evropiane, ekonomisë dhe energjisë së qëndrueshme dhe liberalizimit të vizave. Gjithnjë të hapur për thellimin e bashkëpunimit me Gjermaninë, partnerit tonë të pazëvendësueshëm, me një rol qendror në Bashkimin Evropian ku vendi ynë natyrshëm dhe pashmangshëm aspiron të integrohet”, ka shkruar kryeparlamentari Konjufca.
Konjufca ka udhëtuar për vizitë zyrtare në Gjermani të hënën, ku ka zhvilluar takime të ndryshme. /Teve1.info/