Kryetari i Kuvendit të Kosovës, Glauk Konjufca, thotë se Deklarata Kushtetuese e Kosovës u bë zëri unitari i përcaktimit të vullnetit politik të popullit shqiptar në Kosovë.
Konjufca thotë se edhe sot Deklarata Kushtetuese është shembull i shkëlqyer se çfarë do të thotë kur një popull i vendos ligjin vetvetes.
Ai ka nderuar delegatët e Kuvendit të Kosovës, të cilët më 2 korrit 1990, thotë se me aktin e tyre vendosën një nga gurët themelorë nëpër të cilët ka ecur lufta e lavdishme e popullit tonë për liri dhe pavarësi.
“Në këtë akt shpaloseshin parimet afirmative për vetëvendosje të popullit dhe barazi mes kombeve, përballë regjimit të Serbisë që përmes shtypjes dhe represionit ruante dhunshëm asimetrinë mes rendit të qartë faktik dhe një përcaktimi juridik jashtë realitetit. Pikërisht në këtë mospërputhje radikale, Deklarata Kushtetuese e 2 korrikut do të prodhonte atë çarje politike, prej ku pasoi dhe Kuvendi i Kaçanikut më 7 shtator 1990, kur Kosova shpallej republikë, Referendumi i vitit 1991 për pavarësi, zgjedhjet e para të vitit 1992 dhe lufta e UÇK-së për liri; e deri te shpallja e Pavarësisë së Republikës së Kosovës më 17 shkurt të 2008-ës”, ka shkruar Konjufca në Facebook./teve1.info/
