Kryeparlamentari, Glauk Konjufca ka reaguar ndaj deklaratës së Përfaqësuesit të Lartë të Bashkimit Evropian, Josep Borell, i cili ka uruar qeverinë e re të Serbisë duke thënë se mezi pret të punojë me ta.
Konjufca ka shkruar në rrjetin X, se BE me padurim pret të punojë me qeverinë serbe, ndërkohë që nuk dëshiron të heqë masat ndaj Kosovës, të vendosura vitin e kaluar.
“Me keqardhje dëgjohet se BE-ja po pret me padurim të punojë me qeverinë serbe, duke përfshirë zëvendëskryeministrin Alexander Vulin, i cili është nën sanksionet e SHBA-së për lidhjet e tij të ngushta me Rusinë, ndërsa ata ende nuk janë të gatshëm të heqin masat e padrejta kundër Kosovës”, ka shkruar kryeparlamentari në platformën X.
Ndryshe, Borrell ka thënë se mezi pret të punojë me Qeverinë e re të Serbisë.
Por, ai shtoi se veprimi në përputhje me vlerat dhe politikat e bllokut janë thelbësore për rrugën drejt anëtarësimit në BE.
“Urime kryeministrit të ri të Serbisë, Millosh Vuçeviq. Mezi pres të punoj me ju, ministrin e Jashtëm Marko Gjuriq dhe Qeverinë serbe, për ta çuar Serbinë përpara në rrugën e saj drejt BE-së. Rreshtimi përkrah dhe veprimi në përputhje me vlerat e BE-së dhe politikat e jashtme dhe të sigurisë, janë shenja thelbësore të orientimit strategjik”, ka shkruar Borrell në “X”.
Më 2 maj, deputetët e Kuvendit të Serbisë zgjodhën Qeverinë e re, të kryesuar nga Millosh Vuçeviq, i cili paralajmëroi ditë më parë se Serbia nuk do t’i ndryshojë qëndrimet e mëparshme në lidhje me Rusinë dhe Kosovën.
Departamenti Amerikan i Shtetit u shpreh i zhgënjyer me propozimet për Qeverinë e re të Serbisë.