Kryetari i Kuvendit të Kosovës, Glauk Konjufca ka thënë se Beteja e Koshares është ndër më të lavdishmet e Ushtrisë Çlirimtare të Kosovës.
Ai në 24-vjetorin e saj ka thënë Beteja e Koshares është kuptimi i sakrificës se si duhet dhe vdiset për atdhe.
“Beteja e Koshares është ndër betejat më të lavdishme të luftës së Ushtrisë Çlirimtare të Kosovës. Është kujtimi e kuptimi i sakrificës sublime se si duhet atdheu dhe si vdiset për të. Është trimëria dhe heroizmi i pashembullt i burrave dhe grave, djemve e vajzave të UÇK-së, monument në vetvete më i lartë se vetë kreshtat e Kosharës”, ka shkruar ai në Facebook.
Ai ka thënë se 24-vjet më parë në këtë betjë po shkruhej me gjak çlirimi i Kosovës.
“24 vjet më parë, në Koshare po shkruhej me gjak epopeja për çlirimin e Kosovës nga regjimi gjenocidal i Serbisë agresore. Ndërsa sot, idealet e luftës çlirimtare të popullit tonë dhe amanetin e të rënëve do ta çojmë në vend vetëm nëse të gjithë bashkë, me përpjekje të pareshtura, do ta mbrojmë, forcojmë e përparojmë pavarësinë, integritetin dhe sovranitetin e Republikë së Kosovës. Kujtimi i të rënëve në themelet e shtetit tonë do të jetë i përjetshëm. Lavdi”, ka shkruar Konjufca./teve1.info/
