Dialogu Kosovë-Serbi veç të tjerash ka qenë temë diskutimi në takimin që e ka pasur kryeparlamentari Glauk Konjufca me Këshillin e Ambasadorëve Amerikanë.
I pari i Kuvendit i tha diplomatëve amerikanë se Qeveria është e përkushtuar për të gjetur një zgjidhje në të mirë të të dyja vendeve, porse nuk do të pranohen modele që rrezikojnë shtetin.
“Qeveria e Republikës së Kosovës është jashtëzakonisht e përkushtuar ndaj dialogut dhe gjetjes së zgjidhjes më të mirë për qytetarët e të dyja shteteve, por assesi, në asnjë rrethanë nuk do të pranohen modele që rrezikojnë shtetin dhe lirinë e qytetarëve të Kosovës”, tha ndër të tjera kryeparlamentar Konjufca, theksohet në një komunikatë të Kuvendit.
Në anën tjetër, anëtarët e Këshillit të Ambasadorëve ritheksuan vazhdimësinë e mbështetjes së popullit dhe shtetit amerikan për Kosovën dhe aspiratat euro-atlantike të saj, thuhet tutje në komunikatë.
